|
An heol a strink skeduz a-dreist d’ar meneio,
Har a ra lugerni ar gliz war ar branko ;
Er c’hoajo e klever richan al laboused,
Dudiuz, ’dreuz d’ar gwe gant an avel douget,
En tour an iliz koant ar c’hleier ’zav o mouez
Da zigas zonj d’an holl deuz an anaon kez
Galvet d’ober o feuc'h gant an otro Doue,
Hag a lar d’ar re veo pedi stard evit-e.
Eun den e-kreiz e noad, skanv ha zeder a ia
He-unan gand an hent, gant eur falc’h war e skoa,
Hag en eun dorn d’ean eur voutaillad jist mad…
A-benn en-berr d’an noz ’vo falc’het foenn er prad.
Diwisket e borpan, tronset e vilgino,
E rocheden dibrenn, e askle dizolo,
Lemmet gant-an e falc’h, e krog gant e labour,
Dindan an heol skeduz a lak an treo flour.
Ar yeot glaz war e lerc'h a goe founnuz-founnuz,
Hag o welet anê, ’kreiz al labour poaniuz
A ra d’eur c’houezen stank redek diouz e dal,
E galon gant ar joa ’n em laka da dridal,
« ’Vid ar bla, emean, pa deuo ar goanv kri,
Ma loened en o c’hraou ’nevo foenn da dibri ;
Ma c’hezk, a dra zur, a deuo tomm o goad,
Ha ma zaout, gwellaet, a roio d’in lez mad.
« Ha mar plij da Zoue, ’zo bras e vadelez,
Skuilh e vennoz warn-on ha war ma ziegez,
Me a vo peet mad deus ar boan ’m euz hirie,
Ha kichen eun tantad me diskuizo neuze… »
O sonjal kement-se e kav e nerz kresket ;
E falc’h e-mesk ar yeot a red buhan bepred,
Ha daoust d’ar c’houezen ’zo deuz e dal o redek,
Ankouaet ’ra e boan, mui-ouz-mui kalonek.
Eur veach an amzer e chom eur pennadik
Ha mont a ra laouen d’evan eur bannac’hik
Deuz ar voutaill kuzet du-hont en troad ar c’hleu,
Rag an heol a zo tomm, hag ar sec’hed a deu.
… Sethu an abardae : Achu eo an devez,
Ar falc’her ia d’ar gear ha gant-an levenez.
Skuiz eo, ha war an hent e dreid a goe pouner ;
Mez e galon bepred ’zo evruz ha zeder.
Gwelet a ra e di, du-hont ’barz an draonien,
Ha deuz ar siminal e sav eur vogeden ;
Bremaïk, gant e wreg ha gant e vugale
E tebro zouben vad, ouz an dol ’n e goaze.
…Bean zo eur falc’her ha na ve skuiz kammed,
Falc’had a ra an dud dre bevar c’horn ar bed,
Ha heb bean lemmet, e falc’h ve lemm delc’h-mad ;
Heb dale, marteze, e teuo d’hon falc’had.
An Tremener.
29 a viz Gouelen 1898.
|
