Kerc’heiz, war ribl an dour, difinv hag enkrezet,
Ha da vuhez ’vefe beza atao e ged,
Heb esperans da gaout eur c’horn douar dister
E-lec’h ma tiskuizi da eskell, dibreder ?
A-boan ’vez diskennet war c’horre eur palud
M’hen dilezez affo en abeg m’az kwel tud,
Evit nijal a-bell ha zoken hep paouez ;
Koulskoude n’ez out ket, ’gredan, divrôadez.
Gwir eo, an hemolc’her a zo d’az re trubard,
Hag outan alïes ec’h eus da ziwall start.
Peur, eta, loen aonik, e welimp er bed-man
Espern an dinoazder ’vuntrer kement breman ?
Da lod a zo beva er yuniou digenvez,
Ha c’hoaz ’renkez eno bepred teurel evez ;
Evidout tost d’an den n’eus ’met deiziou garo
Ken ’deuio d’az samma Perc’hen treut ar Maro.
