Barzhaz Breizh/1846/Baron Jaouioz

Oberennoù damheñvel pe handelvoù all zo ivez, gwelout Baron Jaouioz.

Théodore Hersart de La Villemarqué

Barzaz Breiz

Franck, 1846  (Levrenn 1 Levrenn 2, p. 342-350)

XXVIII

BARON JAOUIOZ.

(Ies Kerne.)

I.

Pa oann er ster gant va dillad,
Me gleve ’nn evn-glot huanat.

— Tinaik mad, ne ouzoc’h ket ?
D’ar baron Jaouioz oc’h gwerzet.

— Gwir e ma mamm pez ’m euz klevet ?
Ha da Jaouioz kouz onn gwerzet ?

— Ma merc’hik paour, ne ouzonn ket ;
Digant ho tad her goulennet.

— Ma zadik, d’in-me leveret,
Ha da Loeiz Jaouioz onn gwerzet ?

— Ma merc’hik ker, ne ouzonn ket ;
Digand ho preur her goulennet.

— Ma breur Lannik, d’in leveret,
Ha d’ann otrou-ze m’onn gwerzet ?

— Ia ! d’ar baron c’hui zo gwerzet,
Ha mont kuit timad a zo red ;

Ha mont kuit heb-dale zo red ;
Ho pae zo digemeret :

Hanter kant skoed enn arc’hant gwenn,
Ha kemed-all enn aour melen.

— Ma mammik, d’in-me leveret,
Pe re dillad a vo gwisket ?

Va brouz ru, pe va brouz gloan wenn,
Hag e deuz gret va c’hoar Elen ?

Va brouzik wenn, pe va brouz ru
Ha va c’horkennik voulouz du ?

— Gwisket ann dillad a gerfet,
Va merc’h, kement-se na vern ket :

Eur marc’h du zo e toull ann or,
O c’hortoz ann noz da zigor,

O c’hortoz da zigor ann noz ;
Eur marc’h sternet oc’h ho kortoz. —

II.

Pell euz ar ger ne oa ked eet,
Pa glevaz ar c’hleier sonet.

Neuze n’em lakaz da wela :
— Kenavo d’id santez Anna ;

Kenavo d’hoc’h kleier va bro,
Kleier va farez, kenavo ! —

Pa dremenaz lenn ann Anken,
Tud varo welaz, eur vanden ;

Gwelaz tud varo, eur vanden,
E lestrigou, gwisket e gwenn ;

Gwelaz tud varo kena-ken ;
Rez he c’halon strake he dent.

Pa dremenaz traoniou ar Goad,
Ho gwelaz d’he heul o lampat ;

Kemend e devoa kalonad,
Ken a zarraz he daou-lagad :

Kemend e devoa kalonad,
Ken a gollaz he skiand-vad.

III.

— Tapet eur gador, hag azeet,
O c’hortoz vo dare ar boet. —

Ann otrou oa e tal ann tan,
Hag hen ken du evel eur vran,

He varo hag he vleo gwenn-kann,
He zaou-lagad ’vel daou skod-tan.

— Setu ama eur femelen
E ma onn pell-zo oc’h hi goulenn !

Deomp-ni, va merc’h, war ma brizou,
Deomp-ni da ober va rannou.
 
A gambr e kambr deut-hu, va c’hoant,
Da gonta ’nn aour hag ann argant.

— Gwell ve d’in bout e ti va mamm,
Da gonta’r sklop da dol enn tan.

— Deut-hu gan-in d’ann traon d’ar zel,
Da danva gwin ker c’houeg ha mel.

— Gwell ve d’in eva dour ar prad
Demeuz a ev ronsed va zad.

— Deut-hu gan-in a stal da stal
Da brena’r pawisk da vragal.

— Gwell ve d’in eur vroz liennet,
Mar va mamm e defe he gret.

— Deomp-ni brema d’ar vestiri
Klask brodou da lakat enn hi.

— Gwell ve d’in ann nahenen wenn
A c’hourie d’in va c’hoar Elen.

— Hervez ar c’homzou a leret,
Aoun am euz n’am c’haret ket.

Me gar ve bet eur gor em zeod,
Enn amzer e m’onn bet ker sod,

’M onn bet ker sod euz da brena,
Pa n’em frealzez gant netra. —

IV.

— Diwar ho nic’h, evnigou kez ;
Me ho ped da zelaou va moez :

C’hui ia d’ar ger, me na eann ket ;
C’hui zo laouen, me glac’haret.

Va gourc’hemennou a refet
D’am holl vroiz, pa ho gwelfet ;

D’ar vammik e deuz va ganet,
Ha d’ann tad en deuz va maget ;

D’ar vammik e deuz va ganet,
D’ar belek koz deuz va badeet.

Kenavo d’ann holl a larfet,
Ha d’am breur e ma pardonet. —

V.

Eunn daou pe dri miz goude-ze,
A oa he zud enn ho gwele,

En ho gwele, ha kousket dous,
Endro demeuz a hanter-nouz.

Na diabarz na mez, neb trouz :
Toull ann or klevzont eur voez dous ;

— Va zad, va mamm, enn han Doue,
Laket pedi evid on-me ;

Pedet ive, ha gret va c’hanv :
Edi ho merc’h war ar vaz-kanv. —

————