Barzhaz Breizh/1846/Stourm ann tregont

Oberennoù damheñvel pe handelvoù all zo ivez, gwelout Stourm an Tregont.

Théodore Hersart de La Villemarqué

Barzaz Breiz

Franck, 1846  (Levrenn 1 Levrenn 2, p. 324-330)

XXVI

STOURM ANN TREGONT.

(Ies Kerne.)

I.

Ar miz meurs, gand he vorzoliou,
A zeu da skei war hon noriou ;
Ar gwe a bleg gant glao a-buill ;
Ann doen a strakl gand ar grizil.

Hogen ne ked he vorzoliou
Hebken, a sko war hon noriou ;
N’ed eo ked ar grizil hebken
A lak da strakal ann doen ;

N’ed eo ket hebken ar grizil ;
Ne ked ar glao a zarc’h a-buill ;
Gwasoc’h eged avel ha glao
Ar Zaozon fall ann hini-eo !

II.

— Otrou sant Kado, hor paeron,
Roit-hu d’eomp-ni nerz ha kalon.
Ma c’honeimp, hiriou ann deiz,
War enebourien euz a Vreiz.

Mar deomp-ni d’ar ger war hor c’hiz,
Ni a roi d’hoc’h-hu eur gouriz,
Hag eur jupen aour, hag eur glenv,
Hag eur vaniel c’hlaz liou ann env ;

Ma laro ann dud, o sellet,
Otrou sant Kado benniget :

« Kouls e’r baroz hag enn douar,
Sant Kado n’en deuz ked he bar ! —

III.

— Lavar d’i-me, lavar d’i-me,
Pet zo anhe, va floc’hik-me ?
— Pet zo anhe leverinn d’hec’h :
Unan, daou, tri, pevar, pemp, c’houec’h ;

Pet zo anhe leverinn d’hec’h :
Pet zo anhe, otrou : pemp, c’houec’h,
Seiz, eiz, nao, dek, unnek, daouzek,
Trizek, pevarzek ha pemzek.

Pemzek ! ha lod all c’hoaz war lerc’h :
Unan, daou, tri, pevar, pemp, c’houec’h
Seiz, eiz, nao, dek, unnek, daouzek,
Trizek, pevarzek ha pemzek.

— Mar ’d int tregont kouls evel-d-omp,
Arog ! potred, ha bec’h war-n-omp !
Prim d’ho c’hezek gand ar skoursal !
Na zebfont ken glaz hor segal ! —

Ker buhan a gouee ann toliou
Ha morzoliou war anneoiou ;
Ker koevet a rede ar goad
Hag ar waz goude ar barrat ;

Ha ken didammet ann harnez
Egal pillennou ar paourkez ;
Ha klemm ar varc’heien er c’hloaz,
Ker rust eget mouez ar mor braz.

IV.

Pennbroc’h a lavare neuze
Da Dinteniak, pa dostae ;
— Dall tol ma goaf mad, Tinteniak ;
Daoust hag eo hen eur gorsen wak ?

— Pez a vo gwag, e-berr amzer :
Pouden da benn, va mignon kaer ;
Meur a vran a skrapai enn han
Ha bekai boeden anezhan. —

Oa ked he gomz peurachuet,
Eunn tol morzol d’ean en deuz roet,
Ken a flastraz, ’vel eur melc’honen,
He dok-houarn kerkouls heg he benn.

Ha Kerarreiz, dal’ m’her gwelaz,
A skign he galon a c’hoarzaz :
— Mar chomfent holl, evel heman,
Gonid e rafent ar vro-man. —

— Ped anhe zo maro, floc’h mad ?
— Ne welan tra gand poultr ha goad.
— Ped anhe zo maro, floc’hik ?
— Setu pemp, c’houec’h, seiz, maro-mik. —

V.

Adalek goulouig ann de,
En em gannont bete kreiste ;
Adalek kreiste bete noz,
En em gannont eneb ar Zaoz.

Ha ’nn otrou Robart lavaraz ;
— Sec’hed am euz, ia sec’hed braz !
Ken a droc’haz out-han Ar-C’hoad :
— Mar ’t euz sec’hed, potr ev da c’hoad !

Ha Robart, pa’n deuz he glevet,
Gand ar vez tec’hi en deuz gret,
Ha war ar Zaozon e ma kouet,
Ha pemp anhe en deuz lazet.

— Lavar d’i-me, lavar d’i-me,
Pet zo anhe c’hoaz, va floc’h-me ?
— Otrou, lavaret a rinn d’hec’h :
— Unan, daou, tri, pevar, pemp, c’houec’h.

— Ar re-man a vo losket beo,
Ha kant gwenneg aour a beo,
Kant gwenneg aour-flamm, peb unan,
Abeg da vijou ar vro-man. —

VI.

Kar d’ar Vretoned na vize,
E ker Joslin neb na ioue,
O welet hor re ’tont endrou,
Bleun banal ouz ho zok-houarnou ;

Na vije kar d’ar Vretoned,
Na d’ar zent a Vreiz keneubed,
Neb na veule ket sant Kado,
Paeron brezelourien ar vro ;

Neb n’estlamme, neb na ioue,
Neb na veule, neb na gane :
« Kouls er baroz hag enn douar,
Sant Kado n’en deuz ked he bar ! »

————