Buhez Santez Nonn


BUHEZ


SANTEZ NONN.



Deus pater.

Ael mat quae en stat man
abreman voar an bet
Bede Patricius : joaeus gra escus net
mont voar tech an lech hont
dezaff gra pront contet
Querzet certen dren bro
Eno ne chomo quet
Lauar dezaff parfet
diuset ezaedi : gant doe just ha leal
real dre e aly : da pen tregont bloaz eo.
Ez duy beo sant Devvy
aman da bout ganet
proficiet edy.

angelus ad patricium.

Lleo Patricius diuset
Les an placc man na ehan quet
Eux a hanen da em ten net
gant doe so cren gourhemenet
Da tregont blizien ma entent
Ez duy aman vnan an sent
… Et deuy leun a squient

patricius.

… so non parail maruaillet
a gant da moez ez off soezet
Oz songaff bepret an fetou
em calon don ez estonaff
ne gon en noar pez a graff
Sebtzaff a graff gant caffou
Frustet eo cren ma pedennou
collet en bet man ma poanyou
coezet off e gou ha souzan
ouziff bout digracc discascun
soingis de ia dre ma hun
ma cacc voar jun euit vnan
Na duy hoaz an tregont bloaz man
ne vezo ganet credet glan
ha monet hep span a hanen
monet voar mar e bro arall
ha bout pen ysel euel dall
euez caffout goal a gallen

Petra eo da doe guir roe glen
euel goas lig en seruichen
guellaff maz gallen ne gren quen
pan eux cusul dam exuly
eux an bro man ma forbany
… seruichi muy bizuiquen
Me yelo breman voar an glen
ma hunan breman a hanen
den da perchen nem gouleno
palamour sascun da vnan
na duy hoaz en tregont bloaz man
me aia breman dre an bro.

deus pater.

Ael flam dinam entent aman
quae rac da drem lem a breman
bed patric glan so souzanet
Comps flam familiarament
Sal delcher flam mandamant
ez vezo presant constantet.

angelus.

Lleo Patrici na difiquet
E doe roe bet rac an fet glan
te vezo apostol ha pen
do quelen en enesen man
Enez pep tro te vezo poan
palamour glan da roe an bet
hoguen doe roe tir a miro
dit tra hedro na noaso quet.

patricius.

En calon reson pan soingaff
Ha bout inspiret a credaff
gracou a rentaff quentaff pret
Rac me preder lem a breman
dre credancc an contanancc man
gant an speret glan elanvet
me a laeso spacc vng placc net
gant an mab man so diouganet
monet a pret me a preder
tremen gant enor an mor sall
monet hep mar e bro arall
na viziff nep goal ta mallet
Pret eo vn lest e ampresti
euez yscuit merdeydy —
don conduy en Hybernia
ha maziff deia eux a breiz
euit prezec breman an feiz
hac vn locman reiz don treiza

runiter senex incipit.

Runniter aman off hanuet
maz off leun creff a pep cleffet
duet eo an pret maz decedy
coz off ha leun ah a glachar
nemeux na ioa na cuff na car
negon en noar pez a graff

mors.

Me eo hep dianq an ancou
so duet dre splet an pechedou
an maru off hep gou dan tnou man
pour piuizic ne chem nigun
euit nep gracc quen disascun
na laziff comun ma hunan
Te Runiter cret an guer man
a laziff rac drem a breman
gant vn taol moan me az goano
me az scoy real en calon
Rac me so pugnes direson
gant ma raillon mez estono

runiter.

Ach autro doe so guir roe bet
pardon diff net am pechedou
guenez certen ez off prenet
dam miret oz drouc speredou
Me guel vng corff maru an garuhaff
me ya de sellet a credaff
ha de diuisquaff quentaff pret
aour nac argant mar deux gantaff
me aya a herr de enterraff
de sebeliaf nen nachaf quet
Me a soing a scler em speret
vn den aman pan deuz an pret
a voe sebeliet a credaff

pemdec bloaz so rac drem a breman
ma oz gouruez en bez man
goude e poan oz ehanaff
Doe guir roe bet a requentaff
breman presant mar plig gantaff
gant merit e rescuscitaff
ha digacc guir buhez dezaff

patricius.

Maz safo breman ahanen
da monet buhan dre an glen
cuff hac vhel eguit quelen
laesen doe hac e gourhemen.

runiter rescuscitatus.

Ach autrou doe so guir roe bet
me so net rescuscitet scler
goude ma angoes han esflam
en placc man flam a pell amser
A het pemdec bloaz e noaz der
cals a hirder a quemeren
aman coff ha quein ez breiniz
aet voan voar ma quis da dispen
Aman ma hunan ez manen
den a nep pen nem goulene
duet eo diff consol am soulacc
goude hir spacc, acc a gracc doe
Dre da oreson discomboe
em dascorchas doe an roe mat

Maz off duet pep tu e buhez
Eguit an fez he neuezhat
ha hoantec da trugarequat
da heul euel tat ha patrom
dre gracc quer mab doe guir roe ster
a grif sider da ynerdon.

nauta.

Deomni tut sauant ha santel
me aya breman didan goel
setu vhel an auel mat
deomp randon euel tut onest
Eza merdeidi manifest
mazaimp prest en vn lestrat.

patricius ad runiter.

Deux gant apetit Runiter
guenef scler bede Hiberdon
maz groahimp apret hon trette
da seruichaf doe guir roe tron

runiter.

Mma studi ma opinion
voa gueneoch ha reson monet
dre hoz mister ha hoz merit
ez off iscuit rescuscitet

nauta.

Setu huy en Hibernia

en enes clos hanuet rosina
breman gat ioa na esmayt
pan edouch certen en enes
doe ra roy deoch ioa paradoes
adieu expres ny hoz les cuit

patricius.

Doe ra roy deoch scler cals merit
da monet dan bro ha profit
ha cals gonit euidant
ny a pedo doe guir roe ster
maz vihet flam e pep amser
adieu ma tut quer reuerant

nonita vovendo.

Ach autrou doe se guir roe bet
receff ma requet en bet man
ma mir e pep lech oz pechet
e gracc meurbet an speret glan
En bet ne deux quet nemet poan
pan vezer aman ganet
ha cals a souzan hac a nech
allas dre an bech a pechet
Dre cals azrec me az requet
ez vezo cleuet ma peden
mar be profit na merit glan
ez ahen breman ahanen
me so inspiret meurbet ten

rac ma ael guen am quelen scler
monet breman da leanes
an tra spes eo ma esper
Maz pliche gant doe guir roe ster
en e niuer ma quemeret
me gray veu net a chastete
ha a perseuere bepret
Euel vn merch en he guerchdet
conduy net a apetaff
da goulen hep goab an abit
mar be profit dif acuitaff
me ya grant brut da saludif
an poent quentaf pan guelaf aes
dre cals merit em quefridy
beden leandj alies

abbatissa ad sorores.

Me guel vn merch heruez he derch guerches
so he study dont don ty alies
maz vacq certes courtes da oreson
me aia par tout da gouzoüt diouty
petra a mat a gra en abaty
a he sourci ha he ompinion

nonita salutando abbatissam.

Me hoz salut louen en facc
guelet ho gracc am soulacy
me compso dich scler an merit

hac an profit am queffridj
Troet eo em brut em studi
dont dauedouch huy en tyman
maz carech scler ma quemeret
ez rahen requet credet glan

abbatissa

Mil melcony ha sourcy en ti man
cals a poanyou hep comps gou ha souzan
mar bech ama en ty man leanes
renoncc dan bet parfet a couder pur
ha man ha tat tiz mat ha pep statur
aranquech sur illur croeadures

nonita.

Doen an poan en leanes
a grif spes heruez hoz leasen
rac me mem ro dirac hoz drem
da sintif lem oz pep gourchemen
Dre hon reol ret ro dre scol goulen
ha dren chabistr quent maz ministren
cusul pep pen a quement so enhy
me aia hegar hep mar dre hoz caret
da gouzout scler a huy ve quemeret

rac gourtoet moz pet hoz quefridj.


(Vadit ad capitulum.)

Leaneset cleuet denesset huy
breman sider mecher vn materi
parfet detri dre congregation
duet eo vnan ama da bout leanes
ne cafaf gour he quen flour quen courtes
eman guerches expres en oreson
maz goulen spes courtes dre guir reson
oll mar bech huy a vn opinion
deuotion he deueux da donet
da seruich doe an roe an guir croeer
leueret spes ac ef so hoz esper
en hon niuer ez ve scler quemeret

sanctimoniales.

Mar deu sauant prudant e pep andret
ez dlehemp scler sider he quemeret
huy goar neta hy so parfet acc
da seruig doe diuoe so guir roe bro
perseuerant sal he sem contanto
hac ez vezo e pep tro en hoz gracc

abbatissa.

Mont bet en hy hac en ty he digacc
a griff breman hep nep poan buhan acc
sellet he facc so soulacc è pep placen
me goar defri ezeu sapient
me a conclu ezeo a tut prudant
maruaill vaillant ha constant he santen

(A Nonitam eam introducendo.)

Duet guenef presant merch santel
beden ty santimoniel
cuf hac vhel euit guelet
maz cleuimp expres hoz reson
hoz studi hoz opinion
hoz deuotion da donet.

nonita ad Abbatissam.

Da seruichaf doe guir roe bet
ameux studiet credet sur
maz beuif iurdic bizuiquen
na nem bezo certen quen cur

abbatissa ad Nonitam.

Orzca voar se pan eo oz appetit
Guisquaf hep goab a didan an bet
cals a merit ha profit euydant
dre cals enor deoch ez vezo coruo
ny a autreo dren pez mazeo hoz hoant.

Setu aman breman an comanant
lesel an bet a renquet competant
aour hac argant han hol paramantou
ha mam ha tat ha pep stat relatet
hac hoz querent da pep poent ententet
ha renoncc net da splet an pechedou
ret vezo iun, ober alusenou
dirac roe tron ober oresonou
dren vertuziou deuotionou bras
pichirindet bepret da compret poan
mintin ha nos gourtos hep reposuan
entet glan a breman deomp an cas.

nonita.

Contant of net bepret da compret poan
Joa ameux glan pa hoz eux diouganet
me he dougo vn dro hac em profit
a guir amit hoz eux dif recitet.

abbatissa.

Deux gant merit ez profit Nonita
mez benig glan breman hep ehana
ha da guisquaff dit gant ioa an abit
mir dif courtes hac exspres an lesen
desq an psaulter ha quae dan oferen
breman a cren me a gourchemen dit

nonita ad seipsam.

Breman ezeo aes ma esper
amoa pell amser prederet
ma studj ma opinion
voa e religion monet
Da servichaf doe guir roe bet
ezof em laquet apret mat
lesel an bet me a preder
nem deur uep amser he merat
Breman rac drem me a quemyat
diouz he hol stat ha he madou
da servichaf doe guir roe ster
ha soliter em oberou
Bezout hep si obediant
suramant dan mandamantou
beuaf real e lealtet
ha miret oz an pechedou

rex kereticus.

Orzca breman deomp buhan voar an maes
maz tut real amsal hac a pales
tregont bloaz spes a certes ne lesat
na chomet gour na day de nem pourmen
maz vizimp franc dianc diouz pep anquen
hiuiziguen pret eo plen louenhat
Pan of den bras den a choas hac a stat
e keritic so hep vicc provincc mat
deomp hegarat tut mat da ebataff

ret eo parfet monet da demetri
rac se me men ma enten bet enhy
me meux en hy an audiui muyhaf
Hac em calon quen don ez resonaff
ha ma speret bepret oz repetaff
na diferaff en taf ne menaf quet
duet em studi hac em opinion
em concianzc emeux vn doetancc don
heruez reson guirion ret eo monet.
Dre ma hunfre dif ez e reuelet
monet hep soez en dez da claz goezet
rac se tut clet parfet ez hoz pedaf
setu deompni defri liffrini ac en placc
dre un soulac gant spacc de discoazcaff


an quiznesl.

Me hoz guinhezl a quehezl mat
hac a goar an tro voar tro choat
me goar ho great quen natur
hac an hol loznet mo guedo
bleiz ha heizes mo encreso
mar bez en bro mo cafo sur

secundus.

Autrou duet hep mar da arhuest

a tost dan mor en vn forest
certen eno ny o caffo prest
a pep sceurt heni manifest

tertius.

Euit loezn du me so cruel
ha caru maruel mar en guelaf
me meux liffrini raliet
a groay apret ho diffretaff

quartus.

Gat na louarn ne espernaff
euit ho tagaf quentaf pret
mar ho cafaf moan voar an reau
delcher ez veo lampereuet

primus.

Rac se hastomp na tardomp quet
deomp voar roez da clasq an goezet
mecher no neux quet a roedou
rac voar an placc gant an chacc man
donet a duy bras ha biban
a dalchimp glan a vnanou

secundus.

Syra hep faut hon guir autrou
deomny tizmat dre an coatdou

da clasq don an vanesonou

rex.

Me ameux net preparet banquedou
e demetri hep comps muy couiou
euel autrou em madou ez gnouo
an tut a choas tut bras adiasez
an tut vaillant prudant gant carantez
hac autronez gant guir fez am bezo
Deomp voar se ny a pourueo
a vanesonou maz gnouo
hac a gybyer ny quemero
quement hep nep goal a fallo

nonita.

Me aia scler dan offeren
dan ylis guen em em teniff
aielo prest dren forest man
breman buhan ne ehaniff

rex.

Me guel vng merch heruez he derch he guerchdet
en oreson quen dison oz monet
he ne gon quet en bet pez a preder
me men gouzout hep nep dout diouty
pe alech voa na pelech ez ahy
yt da guitty da comps outy try guer

nuncius regis ad Nonitam.

Huy demesell so trauellet
aman hoz hunan souzanet
ha rac se parfet hoz pedaff
donet breman a perz an roe
so razas oz tremen vase
peur dicomboe de auoeaff
Noz bezet dout da cornps outaff
breman gant brut de saludaff
rac se duet scaff hep tardaff quet
setu eff arriuen diguez
da guelet coant ho carantez
hac an guirionez gouzuezet

rex ad Nonitam.

Merch flour courtes douces plesant
Salud prudant a presantaff
aet off e pep quis pen ysel
vaiilant santel pa hoz guelaff
Ouzouchuy goulen a menaff
an poent quentaff hep bezaff lent
maz dereit flam hoz amser
na piu eo sider hoz querent

nonita.

Pan aedoff aman voar an hent
ma querent so tut antentic
tut fier a britonery

a noblanc a ti piuizic
Leset pep stat ha pep praticq
antentic em em aplicquet
ha duet breman en leandj
hac oz roe vellj raliet.

rex.

Quen fournis ez off rauisset
duet off diapell doz sellet
en hoz quenet emem hetaff
dre maz ouch merch huec ha hegar
quement maz ne cafaff par
hep quet a mar en hoz caraff
Quement maz off ezaedof claff
ma doucc buel pa hoz guelaff
ha finissaff a mennaff net
ouzouch en hoz drem memem clem
me comps affo dirac hoz drem
ret eo deoch lem reif diflf remet

nonita ad Regem.

Me cret nep lech ne carech quet
ez grahemp pechet en bet man
huy so roe hep faut hac autrou
na grit dif caffou na saouzan

rex ad Nonitam.

Pan edomp aman didan coat
en vn lech secret hep cretat

reit diff tiz mat ma pligadur
moz quef merch iolis suffisant
breman en haff hoz cafaff coant
hep bout neant ma auantur

nonita.

Pan gouzafen garu an maru yen
gant nep sceurt den nen soutenaff
guell ve dif meruell hep dellit
eguet dren sceurt lit acuitaff

rex eam violando.

Rac se noz deur quet concedaff
na dif me presant consantaff
rac se da forzaf a gra sur
pan gousoch distac ma naquat
ha na rez nep digaret mat
me gray ma grat ma pligadur

nonita ad seipsam.

Me so neant ma auantur
ha dirac an tut quen hudur
hac a murmur pan yscurer
me meux dirac pep mil rebeig
oz sout outy nac ouz digueig
tra sacrileig eo ma mecher

rex pœnitens.

Hastomp breman ha deomp dan Ker
monet da coffes eo ma esper
me meux torret scler he guerchdet
ha hy merch glan ha leanes
refus a grae hi alies
ameux dicourtes oppresset
En placc man me guel diouganet
dou men en he luz de cuzet
santel meurbet en he creten
da pinigen memem teno
da guir roe sent a mem rento
a amanto a gouelo ten

nonita.

Ach autrou doe so guir roe bet
me so oppret an pret man
digracc voar an placc discascun
ha me hoaz voar yun ma hunan
Ne gorreif ma drem a breman
gant mez ha souzan voar an bet
guerch voan ha glan ha leanes
me cret bout certes brasesset
E ne beut spacc dre digracdet
ez of forzet violet ten
gant vn tirant hep consantj
ne gallen muy ma mem difen

Me ia sider dan ofïeren
hac ahannen a mem teno
da ober espres oreson
doe guir roe tron ram pardouo
Monet ma hunan dre an bro
certen nep tro nem guelo den
beuaf auster e pridiri
na ioa ne grif muy bizuiquen
Guerches mari mez suppli plen
pan duy an termen da guenel
pidif da mab courtes Jesu
maz guillif condu ma buguel
Ha maz vezo cougant santel
ha diouguel ha reuelant
maz vezo courtes dre reson
ha guirion e bro bretonet
Ach autrou doe roe pep noeant
conseru prudant ma auantur
ha maz guillif plen laouenhat
mir e guir stat ma crœadur
Me guel kernch, tnou burzudou pur
rac dreist natur ezeo furmet
te a goar doe nen autreis
na nep quis concedis quet

unus ex comitatu regis mirando.

Setu non parail maruaillou
so duet en placc man oz an tnou
carguet hep gou a losou mat

rac mazoa homan leanes
santes guir merch ha guir guerches
rac dre exces ez opressat

secundus.

Aman so sanctel da guelet
hac vn lech so leun a jechet
ha a pep quenet credet sur
breman an tra man so haznat
an mab bihan a diouganat
furmet a enep stat natur

tertius.

Heman so dan tut burzut pur
setu daou men bras moz assur
aparisset sur dre furnez
pan voe hep youl violet
hac an leanes braseset
aman sauet du cuzet mez.

alter.

Uoar an douar da reif goarez
ha maz gra certen leuenez
an guizuidiguez an frouez man
so a deffri prenunciet
Vng mab bihan e bout ganet
santel meurbet voar an bet man

ambrosius merlinus.

Me eo Merlin ameux vaticinet
Un mal bihan a duy da bout ganet
santel meurbet e bro Breton
den leun a gracc dre spacc e prelacj
bara ha dour eguit e saourj
ne vezo muy e hol refection
Euel maz duy da predication
eno e mam dinam gant estlam don
ne gallo son randon an sarmoner
Palamour rez dan buhez anezaff
a vezo hael pep quentel santelhaff
maz comso scaf ne guallaf rentaf guer
Goude certes courtes ez espreser
buhez ha stat an mab mat hep atfer
pan duy sider e bro bretonery
da pep christen bizviquen ha tensor
ha cals a joa de ja dre e fauor
ha cals enor de cosquor armory

nonita.

Ach autrou doe ma guir roe tat
te goar en mat hep pligadur
Ez off en despes oppresset
guenef conceuet men cret sur
Mar bez da grat da pligadur
mir an croeadur dre furnez

me so e martir ha hiruout
oz reif da gouzout caffout mez
Ach roe tron te goar guirionez
mar e meux carez dellezet
dit me a gra spes oreson
maz viziff guirion pardonet

Legenda.

Bez goaz gant goas ne doan boaset
da ober nem boe quet en bet man
na nem bezo muy bizuiquen
breman certen men souten glan
Me a requet an speret glan
hac a breman ez diouganaf
miret ma corf oz pep torfet
hennez bepret a appetaff
Bezaff auster a prederaff
hac abstinaf a menaf don
bara ha dour eo ma sourcy
hep caffout muy refection

sanctus gildas.

Me eo Gildas gant guir reson
aia peur hegar da sarmon
dre predication onest
An auielou hep saouzan
dan hol comun guitibunan
mar gallaf glan heruez an test.
Dan ylis glan mazedi an fest
han pardon reson onest
duet da arhuest gant maieste

dan gousper ha dan offeren
dre an auiel da quelen
hac euit len Gourchemen Doe.

rex trisinius incipit.

Me eo roe Trisin deomp mintin mat
cza ma bugale dereat
deo da clefuet stat a badez
haz maz groahimp spes oreson
ha da pidiff doe guir roe tron
hac dan sarmon gant guirionez.

primus filius regis.

Deompny ardant gant carantez
pan aedy pardon autrounez
cals a bontez a gouezhimp

secundus.

Eno hep gou ez sezlouhimp
hon siluidiguez maz vizimp
ha maz veohimp drez vizimp beo

nonita eundo ad ecclesiam.

Monet dre pris dan ylisou
da doen ma caffou ham souzan
ha mont em rout hep cafout clem
a grif rac ma drem a breman.
Chom voar ma quis en ylis man

a dreff an or man ehanaff
da cleuet huec an prezeguen
aman eual hen a menaff
Oz an kernch monet ne credaff
aman contemplaf a graf sur
cleuet hep gaou an compsou mat
heruez ma stat ha ma natur
Pan off haznat am croeadur
voar ma aeur na murmuret
a dref ez chimy ne grif quen
da doen ma anquen ham penet
A dreff piler nem gueler quet
ahanen cleuet me preder
hac ez grif ma deuotion
ha cleuet don an sarmoner.

sanctus gildas.

Guir christenien pan ouch plen ordrenet
Supliomp doe so guir roe dan ploueou
reif e graczou deomp hep goudan tnou man
diff da prezec hoantec en e requet
ha deoch presant hep fent maz ententet
dre gracc meurbet parfet an speret glan
Gorreomp hon drem saludomp lem breman
nobl ha comun sascun ha pep vnan
a calon glan breman hep ehanaff
an mam hegar guerches clouar marj
douguomp gant fez goasoniez dezy
oz presanti an aue gratia

novita.

En placc man panouf ehanet
soingaf em caoudet me preder
hac a gray ma deuotion
ha sezlou don an sarmoner.

rector interrogat Gildam cur non potest prædicare.

Mest reuerand ha prudantaff
soezet ha cruel hoz guelaf
a te so claf nac auaffet
perac guirion na sarmonez
nac ouzomp guer ne leuerez
petra neuez so hoaruezet.

gildas.

Un re suspent present ma ententet
en ylis man so breman ehanet
ne guallaf quet voar nep splet procedaff
ne gon certen piu eo den nan heny
ne compsen guer mister nep matery
un re deffri so oz ma faziaff
Edoll en maes deoch spes en expressaf
ma list aman breman da ehanaf
maz ententaf ma bezaff anaf us

neuse hep mar me a essay sarmon
chemet en maes bed guelet an reson
ne gon guiryon pez son am gra confus

rex et alii.

Deomp guitibunan voar a maes
na na vezet gour dicourtes
hac en e proces e lesel
eguit maz duy dezaf squient
cler ha beleyen deomp en hent
maz gallo entent e quentel.

nonita manet in quodam angulo.

Aman em ezomp me chomo
a guele poz a vezo graet
mar bez reson em guirionez
me yelo euez mar bez ret.

gildas.

Ne gon en dez pebez so hoaruezet
guer ne comsen na ne sarmonen quet
vn re so ret so cuzet em metou
men coniur glan breman hep ehanaf
pan aedy sul eguit disimulaf
me meux anaf dioutaff ha caffou

nonita.

Me aedoae ma hunan manet
eguit da cleuet dre detin
en hanu mab doe so guir roe bro
ha cleuet vn tro da doctrin

gildas.

Guir leanes ha courtes expresset
me gourchemen a hauen em tennet
quen na duy pret da donet dauedou
ha neuse net parfet me procedo
dre guir reson guirion me sarmono
moz quemenno eno me bezo coff.

nonita.

Monet en maes ha hoz lesel
dif abe guell hep ma dellit
reson eo present hoz sintiff
oz absantif ez vizif cuit.

sanctus gildas.

Guir autronez gant guir fez asezet
duet en ylis pep quis aboisset
eguit cleuet an splet an speret glan
articlou fez euez han buhez net
an comsou mat da pep stat relatet
an pez so ret deomp parfet en bet man

Christenyen net redimet en bet man
mar fell deoch net bout parfet saluet glan
obseru aman an pez so diouganet
ha mir a cren an hol gourchemenou
ha bez vaillant en hol mandamantou
han vertuziou kernch ha tnou a coudet.
Car doe roe tron a calon resonet
corf hac eneff caref ha douigef net
enor bepret so dleet da quentaf
ha bez hegar hep mar dre e caret
dre e douigaff hep bezaf anaffet
na offens quet voar nep splet pa ez pedaff


Hortatio de Charitate.

Nep en deuez gant fez carantez net
ne gra nep lech a nep bech a pechet
pacient, net, parfet coudet fin
doucc ha clouar, hep mar ha hegarat
eguit nep strouil a orgouill ne souillat
ne deo ingrat nep stat dre nep tatin
Carantez so en bro euez so din
oz da nessaf parfetaff bezaff fin
scler anterin ha diuin continant
ha drouc ha mat e pep stat relatet
dre carantez doe, oll da pep re so ret
mar fell dit net bout saluet conpetant

En paradoes he quifi spes presant
mar bez aman gret glan da comanant
parfet, prudant, vaillant, ha plesantaff
eno hep gou e mil joaeou louen
dirac pep den quen couen oz renaf.


De Fide.

Ret eo feiz mat pep stat hegarataff
a calon duet hac a effet netaf
hep variaf douetaf vacillaf quet
delcher abil voar an stil an ylis.
so fontet mat pep stat dre guir atis
he vaillantis so e pep quis priset
Ret eo fizianc don auber auancet
en speret glan so breman elanhet
ha maru roe bet so duet don remedj
lequeomp hon spi hac hon opinion
gant carantez euez ha gant fez don
en roe guirion so duet don pardony.


De Peccato.

Euez pechet so cometet e ty
dre cuffr calon ha guenou brasony
mir nen heuliy mir nen cometti quet
gobr an pechet bepret pan cometer
eo bout dafnet ha laquet en heder
ma nen lauer ma nen piniger quet


De Pœnitentia.

E pinigen tri tra cren entet
confession satiffacion net
ha poan en bet soret an parfetaff
da pinigen euel hen em tennet
a peuch a doe so diuoe guir roe bet
maz bez chenchet an penet ha gret scaff


De Sacramentis.

Rac se entent dre squient da quentaf
pep sacramant prudant ho goarantaf
ho enoraf hep bezaf auaffet
ha heul an stil so abil en ylis
miri pep stat ha mat dre guir atis
. . . . . .


De Superbiâ et ejus speciebus.

Ha mir pep lech oz an bech pechet
mir dre orgoill en stroill ne ves souillet
arrogant quet na goappa quet laedus
na na barn den bizuiquen nep heni
na vez flatrer na hent ingrateri
mir na tempti, na vizi curius


De Avaritiâ.

Mir na vizi re auaricius
na ysur quet na vez quet couetus
na decefus trompus dre fals musur
bez liberal, real dre lealtet
hac an peoryen bezent plen soutenet
dirac roe bet so pliget meurbet sur


De Luxuriâ.

Na vez laedus na flerius dre luxur
dreiaf pep stat ez an glat han natur
so tra hudur en ordur mailluret
rac se bepret conduet chastete
corff ha speret bepret dre caret doe
vn vertuze da pep re so dleet


De Irâ.

Buaneguez ez buhez naz bezet
na gra quet clem na lem na blasphem quet
na millic quet dre nep drouc apetit
na gra da den nep termen drouc en bet
gra a pep vicc justicc diualicc net
pacientet en bet so dleet dit


De Gulâ.

Diouz gloutoni deffri maz vizi cuit
gra abstinanc a grai cals auanc dit
ha cals merit ha profit euidant
ha sell an fin diouz guin maz abstinj
mir dre reson na heul don sotony
e mezuinti na vizi re friant.


De Invidiâ.

An auius confus a abus cant
e toez an tut dre vn brut imprudant
so inconstant dicoant dicarantez
rac se hep mar bez car hac aparchant
dre caret doue diuoe so guir roe sent
rac se presant car vn meut daz hentez


De Accidiâ.

E dieguy so muy mar studiez
euel vn foll an oll ez em collez
preder maz ez na maz dleez bezaf
berr ha estlam leun a blam eo namser
bez diligant a comanant antier
ne deux mecher ne galler differaf


De Articulis Fidei.

Articlou feiz dit rez pan arbezaf
ho miret cren dit a gourchemenaff
en heu soingaf hep bezaf anaffet
soing a pep tu ez eo tru da buhez
fet an bet man so poan ha bihanez
. . . . . . . . eout bezet
Greomp vng anclin anterin dan trindet
pan duy finuez hon bout rez annezet
gantaf apret parfet a coudet plen
maz vizimp net pardonet hep quet nam
pan dui an fin anterin ha dinam
ad quam gloriam nos perducat amen


rector, rex, atque alii.

Mestr reuerand pebez andret

petra neuez so hoaruezet
na galsesde quet eguetou
sarmon nac prezec dre requet
maz oas dre burzut symudet
a den suspect so en metou.
Lauar deomp an fault guir aotrou
mestr Gildas lauar da gloasou
an misterou niz sezlouo
voar pen hep mar vn guez arall
an tra se rac na hoarfe goall
mar deux den fall nin tamallo.

gildas.

Nobl ha tut gentil hac ylis
christenyen mat a guir atis
comp deoch fournis a abaissaff
penaux voa nam pech am mecher
na compsen naf lauaren guer
me men an mecher dishannaf.
Un leanes pan expresaf
aioa aman oz ehanaff
brases aessaff an guellaf den
a vn mab vaillant so ganty
brassoch a pep tu a study
eguetoff hep si bizuiquen

gildas ad Fabricum.

Gret dezi a randon donet
aman euel gruech em requet

maz vezo aeset an bedis
maz compsiff expres a presant
dirac an tut he bout prudant
incontinant he vaillantis

fabricus ad Nonitam.

Leanes courtes onestet
duet em requet na tardet muy
pep stat beden predicator
beden cador de enori.

nonita.

Pan em requet da monet dy
me yel gueneochuy continant
prezec courtes dre cals mese
oz e maieste am be hoant

nonita ad Gildam.

Autrou courtes hed hoz presant
salud vaillant ha plesantaf
hoant amoa vuel doz guelet
. . . . . . . emem erbedaff

gildas.

Duet mat ra vizii Nonita
leanes certen laouenhaf
carguet eo a ioa ma calon

da mab glan pan vezo ganet
so aeurus ha diuset
da renaff net e bro bretonet.

gildas ad Plebem.

Huy oz oa goulennet apret don
an ampeig hep mar am sarmon
setu reson han guirionez
an merch man ha hy leanes
a royf mab bihan voar an maes
an test expres en em descuez
Setu an reson autrounez
muy eguidoff a pep rouez
vezo an buhez anezaff
rac se quelen ne gallen quet
en e presant dre nep andret
rac se ezoa ret arretaff.
A gracc a gallout hap douetaf
hac an guir ordren da renaff
so roet dezaf an quentaf pret
gant doe roet dre contredy
ha priuilaig ha monarchy
e bretoneri raliet
Dan mab maz voe diouganet
dre gracc diuin predistinet
quent comancc an bet credet sur
e nation an bretonet
dat caffout stat an preladet
prellat meurber da compret cur

Legenda.

Adieu tut mat a pep statur
me hoz laes breman didan cur
an guir croeadur so furmet
aman nep ten ne chomen muy
Joa ha peuch a pedaf deoch huy
an heny so sanctifiet
Hoz recomandaf a graff net
dan mab man pan vezo ganet
ha da roe bet hep arretaff
so instituet credet glan
doz quelen en enesen man
me ya breman hep ehanaff

nonita.

Jesus hegar hoz trugarez
Lamet eo an mez an guez man
dre gracc roen sent e hep quentel
pan eo santel ma buguel glan
Mir oz sourcy ma mab bihan
pan dui aman da bout ganet
maz viziff cuit me Nonita
guerches Maria me az pet

rector mirando.

Setu breman a gouez an bet
gant an den santel reuelet
ha proficiet credet sur

ny guelo an fin continant
an doctor Gildas en assur
bezout vaillant e auantur

rex trisinius.

Me so maruaillet credet sur
rac Gildas so a certen den fur
dilesell an cur apuret
ha techet rac drem a breman
heb ober goab gant an mab man
hac eff aman na deu ganet
mar deu gant el reuelet
vn tra so ret hoaruezet scler
hep ober exces nac estlam
hac eff den din ha den dinam
hon lesel flam e berr amser

primus magus.

Me so hep sy magician
a guelo dirac drem a breman
pan lenniff an scrit a phiton
hac an ygromancc a chancc don
me gray pep demon estonet

secundus augur.

Me so dre augur assuret
hac incantator enoret
diuiner meurbet ezedoff

dre presticc hac auruspicy
geomancc hac ydromancy

tertius augur.

Ne caffet quet guell eguedoff
heb vn nebeut ez gallent proff
hac a delch coff eux ho rouez
dre spatulamancc mil chancou
fallacryez sorcerezou
a gruif hep gou a parz dou dez

primus magus.

Memeux cleuet ne gous pet guez
en vn sarmon em guirionez
arriu eo dez maz gouzuezher
bezout vn mab bihan ganet
vaillant santel dre vueldet
en breiz man a pret credet scler
Me diuin dre vaticiner
Beelzebut maz persecuter
comps an mecher te haberit
. . . pan lech an placc han faecon
maz bez ganet e bro Breton
grit dre nicron deomp e gounit.

secundus magus.

Mar deu en bet de appetit

oll ez collimp ne viximp cuit
ez disgray hon scrit euidant
laqueomp trotant e tourmantaf
mar guellomp so goaz e lazaff
rac maz soingaf et bezaf sant

diabolus.

Me so Diaoul bras goal tasmant
que diguir bede an tirant
na gra seblant a carantez
dre vn despez lauar dezaff
pouls enhaf hoant de tourmantaff
mechant dezaf mar gouzauefez
hennez pan duy dit a gray mez
a vezo vaillant dreist cant guez
a madaelez hac a fez mat
a vezo ganet hep quet mar
neuse nep tro nez vezo car
en e douar peur hegarat

tyrannus loquitur.

Orzca cza tut maty
tut a brut a study
vn sourcy am gruy bras
oz cleuet en bet man
ez duy sascun unan
causit breman a cas
En bro a vezo bras

diuinit na grit mas
dezaf mar gallaf noas
razas me hoz assur
Dran doe me enoeo
pen diaoul ram dougo (foulo)
vn dro men guelo sur
Gret vn pron vn coniur
oz hoz diaoulou fur
ordur dre assurancc
vn som dre nycromance
Grit huy vn odiancc
dre geomancc lancet
ac eff reiz en breiz man
a deuhe hep ehan
da bout aman ganet

primus magus.

Autrou sur me meux coniuret
hac ameux euez gouezet
ebout ganet e bro Breton
brassoch vezo net eguedot
ganteuy esem quifi sot
languis an cnot hac an stroton

secundus magus.

Em studi hac em vision
cruel me guelas vn blason
ma opinion consonant
ez tiourent hac entent se

ez vise ganet gant trette
he dreist pep re ez vize sant

tyrannus.

Men boe da doe ha pep nœant
me yel voar an maes a presant
hac ameux hoant de tourmantaf
rac me a gray tru e buhez
men guedo de ja nos ha dez
dran doe euez mar gouezafF
Me a gray alarm hac armaff
hac clezef noaz ho lazaff
a mennaff hep differaf quet
me gray euezhat en stat man
me ham comun guitibunan
oz an mab man na be ganet

nonita.

Autrou doe crouer an steret
arriu eo an pret a credaf
ma mir ouz langour ha sourcy
guerches mari pan supliaff
tremen tu arall mar gallaff
breman a menaff quentaff pret
rac an guentlou a dezroù diff
diouz ma minif ne guillif quet.
Aman voar an dez mar bez ret
ez vezo ganet a credaff
meurbet of claff hac ezaf fall

monet tu arall ne gallaff

tyrannus.

En placen man me ehano
ha quen dignir me he miro
nep en tremeno me so sur
mar tremen aman leanes
me a gray noas mar bez brases
me gray dezy spes opressur.

nonita.

Vahunt tut cruel a guelaf
na monet scaff ne gallaf quet
ret eo guenell pe menell sur
ma guir croeadur assuret
Rac an rehont ezoff spontet
aman ezeo ret arretaff
comancc a groa stanq ma anquen
an guentl yen so oz ma benaff
Me pet guir roe sent da quentaff
dam frealsaf ne gallaf muy
ma groa preseruet hep quet mar
guerchez clouar hegar mari

tyrannus.

Gant curunou so dezrouet
foultr hac auel ha crueldet
ezeo ret techet an pret man
gant an quaserch so ha glan yen

coruent haluffet credet plen
ne galle den chom en gueun man

secundus tyrannus.

Gant an estlam hon eux aman
me leso vng spacc an placc man
guitibunan deomp ahanen
gant an tourmant oz dismantaff
gant aoun hac anquen ez crenaff
ne gon mazaf no gouzaffen

tertius tyrannus.

Duet eo fin an bet a crethen
bezcoaz outraig enep taichen
ne voue voar ma pen me en touhe
gant curun ha foultr discoultret
a vs ma pen so disquennet
hac an guez nezet mo crethe

nonita pariendo.

Jesus mab mari beniguet
ma sicour mez pet an pret man
quer mam Jesu me az supply
ez sicouri ma mab bihan.
Digacc dif da gracc en placc man
ma mab bihan ma en ganer
quen sempl ezaff ne galaf quen
gant guentl hac anquen em bener

ma na vezaf mam e berr amser
ez rentif sider ma speret
quement maz aff ne guelaff gour
ach doe roe flour ma sicouret
Ne guelaf certen den en bet
na ne gallaf quet monet muy
ne deux gruec na a miegues
dam laquat aes da appessy
Oz hars an men man damany
so duet em studi an muyhaff
pan eo duet an pret dre ditin
ret eo dan naou glin anclinaff

nonita.

Ma daou dorn guen harpet enhaff
ha ef oz rannaf maz graf soez
eguit lamet ah ma glachar
euel ecoar dre vn argouez
ha pa en guelaf ez graf souez
gant carantez guirionez eo
setu aman oz hars an men
ganet eo certen vn den beo
Goude ma anquen me ezneo
hep goab mab eo beo ha seuen
heman eo certen ma tensor
ret eo gant enor egorren
me guel an amser quen seren
ha quen louen plen ha quen fin
hac a heol splan euel an haff

hac ez soingaff e bezaf din
Rentaf gracou voar ma dou glin
a griff anterin dan trindet
pan off gret hep gou main laouen
ha ma mab certen duet en bet
ahanen reson eo monet
gant ma mab ganet pan edy
rac nam be blam oz chom aman
pret eo breman monet dan ty
Pret eo deomp euez anhezy
dre sourcy gant ma mab bihan
maz vezo en fez badezet
e gracc meurbet an speret glan
Me oz supli tut an ty man
douguit breman hep ehanaff
an mab bihan heruez an fez
gant carantez da badezaff

hospes.

Deomp comun gant compaignunez
gant cals reson ha guirionez
maz vezo en fez badezet
gant tut guir da bout compizrien
ha comazreset caezret den
pan eo louen leun a quenet
Pan eo dan prellat relatet
hac en diuis quen discret
ez vezo net badezet sur
dre mazeo den bras hac a stat

bennoez en eur glan maz ganat
auantur mat dan croeadur.

presbiter.

Dez mat golou kernch tnou louen
da mab beniguet cazret den
an mab man certen a reno
hac a bezo cuff hac vuel
ha den vaillant prudant santel
e breiz ysel huy a guelo.
Ma caffet dour nin recouro
heruez an fez en badezo
en benigo pan vezo pret
aman nedeux ran na bannech
na ne guelaf gleb enep lech
na tnou na kernch mazomp nechet


(Miraculo fons nascitur.)

Setu vn feunteun eyenuet
an caezraf nan netaf caffet
a neuez sauet credet sur
nin gray badezet caezret stat
gant an dour man so glan haznat
gant an heur mat an crœadur

(Benedictio aquœ baptismatis seu fontis.)

Guir dour fourmal principalhaff
ha feunteun mat hegarataff
da benigaf amennaff sur
en hanu an tat an mab queffret
hac an speret glan elanvet
maz vizi bepret caffet pur
Duet gant stat gant an crœadur
da bout badezet golchet sur
duet dre aeur voar an euryen
ha te den dall azeux gallout
ha crocq apret naz vezet douet
Heruez da gallout da souten
A te cret en roe doe ha den
a voue scuiz stanc gant cals anquen
beden maru yen oz da prenaff
ha goude ez duy en diuez
da barn a maru han beo euez
pan duy an dezuez diuesaf

patrini.

An trase parfet a credaf
dizreiff oz doe de avoeaf
euez renoncaff a graff net
da pechet dan dan drouc speredou
da tricheboul an diaoulou
ha do euffrou a glan coudet

presbiter.

Devy mez badez gant fez net
en hanu an tat an mab apret
hac an glan speret apret plen
ha maz vizi din ha dinam
beden finuez ha neuez flam
hep quet anam na blam amen

(baptizatur.)

Dal liufre guen ez querchen plen
ha goulouen scler daz deren
dan ty bizuiquen da renaff
dalch badizient hac a hent mat
maz duy dan pret caezret stat
entre re mat da ebatafff

(Pausa.)
cecus.

Me meux cleuet hac ez credaff
ez eux feunteun’oz eyenenaf
guelchi a mennaff quentaff pret
breman hep nac ma daoulaguat
pan ouf dall ha fall e goall stat
ha ma drem plat so trellatet

(Et lavat oculos.)

En lech maz voe rez badezet
an mab bihan neuez ganet

ma guelet parfet so duet diff
a tragarez doe so roe bet
me so dre e dour recouret
mat voe dif me parfet credif
Ma guir fillor a enorif
ha mab deuy a suppliiff
quement mazif ne fillif quet
dirac mab doe so guir roe ster
maz vizif dinam pep amser
hac ene niuer quemeret.

Alter sine naso et oculis.

Allas me so breman poanyet
hep fri na laguat trellatet
ha dall ganet e penet bras
mazof fortunyet en bet man
carguet a reux hac emeux poan
nem sicour vnan voar an cas.
Me suply doe nep am croueas
dren dour neuez a descueuzas
dre burzut bras me hoz assur
en lech maz voe rez badezet
an mabic devy beniguet
vn dall so saluet caezret cur
Doe maz care dre e aeur
am grahe saluet men cret sur
ha dren crœadur procuraf
me ya sider dam mem guelhy
dan feunteun neuez ha dreizif
doe ha devy a supliaff

(Et lavat oculos et nasum.)

Jesu roe noar a caraff
quen hoantec ez trugarequaff
me aioa claf hac anaffet
hac aioa exquis ma visaig
breman off ioaeus a vsaig
guir auantaig a couraig duet
A devy te so benniguet
me so dre da dour recovret
doe re ve meulet an pret man
mazeo dan tut cals burzudou
a trugarez doe roe ploueou
dre da pedennou dan tnou man

presbyter seu episcopus.

Pan eo en guir fez badezet
ret eo pep tu ez conduhet
hac ez macquet a coudet plen
dren pez mazeu din continu
flour ha courtez en hanu Jesu
en placc setu hanuet Ruben
Goude gant enor hac ordren
pan duy an pret acoudet plen
ez vezo certen soutenet
da bout en ylis souysant
da disquif da bout studiant
maz vezo vaillant pep andret

nonita.

Duet eo en mat mat ma crœadur

pret eo e cacc sur dre furnez
maz desquo spes pep oreson
ha pep reson ha guirionez
da bout ardant e carantez
en articlou fez an buhez sur
e cacc da Paulin continant
da bout vaillant e auatur

nonita ad Filium.

Ma mab devy deomny sigur
ma guir crœadur an purhaff
dren pez maz eo onest e stat
da vng mestr mat en hoz grataff

davidagius ad matrem.

Ma mam courtes spes onestaf
hoz sintif scaff a mennaf prest
moz sento courtes gant reson
en traou guirion hac onest

nonita ad Paulinum.

Mestr reuerant e pep andret
salut deoch bepret a pedaf
dre maz a taill den vaillant
gant cals a hoant e presantaf
ma mabdevy da studiaff
da reolyaff gant guellaff pret
en offizcou en traou din

en hanu anterin an trindet
Me hoz gray vaillant contantet
en hanu roe bet ha bezet sur
deoch enor vezo ha do stat
disquiff en mat ma crœadur

paulinus.

Doe roz saluo pep tro ha huy hoz stat
guir leanes courtes a maiestat
hac a eur mat pep stat doz crœadur
duet mat en ty huy ha huy rabihet
hoz mab devy me en gray raliet
men desquo net berr respet credet sur
da bout vaillant prudant a auantur
men groay cloarec da prezec pep lectur
maz vezo fur assur en scriptur glan
en theology ny en gray raliet

magister ad Davidagium.

Chemet devy gueneompny en ty man
benoez hoz man hoz eux flam dan tra man
alies hel cuf vhel hoz guelo
ni hoz desquo vn tro pan vezo pret

davidagius.

Ma mestr Paulinus joyeussaff
hoz caret a graf guellaf pret
euez quement so en hoz ty
an grayen study raliet.

nonita.

Me pet guir roe tir doz miret
me cret ezeo pret recedaff
adeo adiu ma mab devy
pret eo hep sy dispartiaf.

davidagius.

Adieu ma man estlamet
aman meurbet emem hetaff
me chomo spes en hanu Jesus
gnnt paulatinus joeusaff

paulinus.

Adieu dichuy hep sourcy Nonita
doe roz miro pep bro roz bezo joa
da studiaf de ja ny alaquay
hoz mab devy en studi alies.

(Tenet scholas.)

Cza bugale me crethe ez ve pret

mardeo hep sy gueueochuy studiet
ez ve rentet construet lenet sur
ha rac se clouer duet fier dan cercuit
rentit hoz test prest prest na archuestet
hac ententit dre merit an scriptur

davidagius.

Me ya breman hep ehanaf
da studiaff hep tardaf quet
pep profici theologian
maz guylliff entent ma quentel
so dif me vuel reuelet
me yelo presant do rentaff
ma faziaff ne menaf quet
bede ma mestr quer reuerant
so vn den prudant pep andret

primus discipulus.

Me guel maruaillou hep gou quet
voar tro devy quen raliet
coulmguen disquennet de metou
ha quen santel ouz e quelen
hac y quen jolis oz disquen
voar e pen gant canoennou

secundus discipulus.

Nuen reiz ezgoar an hol ardou
pep studi han prophiciou

hac an officou quen louen
Davy so hoantec cloarec bras
dre vn gracc diuin quen dinoas
e quen couls goas ne guelas den

davidagius.

Aman ez chimiff ne griff quen
gant desquebl germen so den mat
en enesen languen vvmendi
e jmmy en vng studi mat
eguit pidiff doe dereat
ha len leiffriou mat a grat plen
Da miret oz an pechedou
auber an vertuziou louen

paulinus.

Me eo Paulin dre vn sin teminet
dre barr auel collet hel ma guelet
dall ha goallet abaffet ezedou
a het decc bloaz goaz oz goaz eza diff
ne gallet quet ne pret ma remediff
ha hiruoudif, nichif pan deu dif coff
Ne sourci glan nep vnan ahanoff
maz of priuet an guelet ha gret doff
me men approff am be me nep rouez
amen pidy hep muy ma disquiblion
maz rohent y ho benediction
hac oreson gant reson guirionez.
Bugale mat dre au stat a badez

mar oz eux hoant presant dam carantez
ozif truez en priuez hoz bezet
gret sin an croas dre guir boas hac a stat
voar ma bisaig hep faig dre vsaig mat
ma doulagat so e drouc stat badet

primus discipulus.

Ma mestr vaillant e pep andret
me hoz grai synet an pret man
en hanu an tat han mab apret
quet queffret hac an speret glan

secundus discipulus.

Me syno hoz drem a breman
hep sellet poan gant an lancgroas
en hanu Jesus dre guir vsaig
me guel en bisaig arraig bras

tertius discipulus.

Breman me a groa sin an croas
gant enor bras me hoz croaso
gant reson voar an beronic
antentic me hoz benigo.

paulinus.

Ac eff so muy aduy dam benizien

gret da davy maz duy hiuiziquen
rac an anquen so yen oz ma benaf
ne gallaf enep stat bout en mat nos na dez
en hanu Jesu porz pep tu a truez
gant carantez me a supply dezaff

primus discipulus ad Davidagium.

Allas Devy mez supli net
bed an rector duet poz peder
reit en mat oz benigaden
rac dreist pep pen hoz goulener

davidagius.

Bed an doctor de enoraff
mont amennaff hep tardaf quet
monet de guelet ne cretsen
me yel cren pan off quemennet
Dec bloaz so breman voar an pret
ne cretsen quet dra arretaig
na nep meur guer ne liuiris
ne sellis an quis e visaig
Mes a queremen em pennaig
ne doa dre faig na outrachi
quement maz aen en dougen net
hac e caret dre meledy
Ma mestr breman gant letany
sctu duet devy doz quichen

gourhemenet scler a queret
reson ez ve gret credet plen

Cui magister paulinus.

Ma guir scolier a manier reuerant
me az suply ez gruy espediant
vn sin vaillant prudant e pep banden
groa sin an croas a choas hac a boas net
voar ma enep so diheuelebet
maz vezo net fresquet dre da peden

davidagius.

En hanu anterin an trindet
tat mab queffret ha speret glan
breman gant fez rac maz gruez clem
me benig da drein a breman
euit maz guili gant dipoan
breman aman a goez an bet (tut)
da daoulagat ha da statur
maz vezo assur vn burzut

paulinus.

Benoez doe tat pep stat dat crœadur
rac ma quelet so duet parfet sur
dre da aeur auantur an furhaff
acc dre gracc doe an guir roe an crœer
breman ezaff quentaff ez guelaf scler
dre da mister fur hep diferaff

conjux.

Me so nechet gant an bet man
oz guelet he splet het ledan
hac ezoff aman souzanet
maru e drouc stat eo ma chatal
gant vn benin re creminall
disleal ma bestialet
Me ya hep mar da lauaret
da doen testeni dam priet
rac an splet so duet morchedus
oz guelet pep stat ma madou
mazoff pourisset hep quet gou
ha ezof kernch tnou caffouvs
Allas ma priet morchedus
off, pa hoz guelaf anaffus
laquet omp confus da musial
paurisset omp breman haznat
fortun so duet ne gallet pat
maru eo pep stat hon hol chatal

maritus.

Lazet ingrat hon hol chatal (?)
a guir eo tra se ha leal
meya rac ma tal eualhen
deux gueneff euez ha bez hel
breman present e berr quentel
beden den santel don quelen
Ha pedomp devy don diffen.

ha deomp gant youl de goulen
pebez prenden so disquennet
da devy hon em supliomp
dezaff beb vn guer discleriomp
hac enoromp na fellomp quet

maritus.

Devy ni so melconiet
hon chatal hon aneualet
so maru ha lazet hon cret sur
mazomp paurisset competant
an dra se so e pour neant
maz eo truant hon auantur
Ach dre amour hon sicour sur
en hanu doe ha dre da aeur
ha maz vizint pur assuret
ha porz a truez en guez man
mar bez profit na merit glan
ho digacc breman voar an bet

davidagius.

Autrou so croeer dan steret
breman parfet ez requetaff
dascorch mar bez mat an chatal
mar bez leal ho jngalaff
Rac ho perchen ho goulen scaff
ha so oz gouelaf quen claffet
roy breman a goez an tut
maz vezo burzut reputet

(Resduscitantur animalia.)

Hoz chatal hoz aneualet
so jachet ha rescuscitet sur
lisit hoz anquen hoz enoe
ha seruichit doe an roe pur

maritus.

Setu dan tut vn burzut bras
guitibunan cleuit an cas
hon chatal bras aioa gloaset
dre Devy ny so guizuidicq
breman setu y pacificq
aioa maru micq ha pistiguet
Beniguet eo doe guir roe bet
hac euez an sent ententet
doe ra ve meulet da quentaff
breman voar an placc men graci
hac entre pep re sanct devy
pep heny ho glorifiaff

nonita.

Aman en hanu doe guir roe bet
en seruichif ne fillif quet
e cals a ancquen ha penet
hep quet amar dre e caret
Visitaf hel an chapelou
dre guir diuis han ylisou
ma men ten dan offerennou

nos ha mintin en abstinancc
voar dour ha bara damp auancc
an re se so da reuerancc
nem bezo quen dam soutenancc
Ma mab Devy so conduiet
ha gant an tut guir inspiret
ma hunan aman off manet
da seruichaff doe guir roe bet
Chomp anterin beden finuez
chast hac ardant e carantez
euit seruichaff nos ha dez
da guir roen tron gant guirionez
Digant roe glen ez goulenaff
pan duy an dez da finuezaff
pep sacramant dam goarantaff
maz vizif glan ha dianaf

rector seu parochus.

Cleuet certen Xpenien mat
ordrenet eo spes coffessat
hac ober pasq mat a stat plen
duet eo deia an hoarays
rac se tut mat me haz attis
duet dan ylis pep guir christen

nonita.

Me yelo apert ha certen
pan eo deomp louen ordrenet
a breman pan off leanes

maz viziff expres coffesset
Goude vaillant sacramantet
recef doe net gant guir creden
dre guir amour ha guir couraig
ha guir seruig ha pinigen

(Ad presbyterum.)

Ma tat gant youl moz goulen
euez absoluen a mennaff
benedicite pater reuerant
goude vaillant sacramantaf

presbyter ad Nonitam.

Ma merch santel pa hoz guelaf
breman syoul hoz absolvaf
an poent quentaf gant guellaf pret
ha vaillant hoz sacramantaf
dalet corf doe hep enoeff
deoch e ministraf a graf net

nonita orando.

Bennoez anterin an trindet
breman ez off net a credaf
ma couraig expres so aeset
mab doe dam miret a pedaf
Breman heuryou a dezrouaff
pidiff scaff gant an anaffnon
nen deuezo den dieznes
me a groay spes ma oreson

Ma chapelet a coudet don
a guir calon ha deboner
pidiff sent spes han santeset
a grif parfet a coudet scler

deus pater ad Lethum.

Dit maruyen me a ordren net
monet breman na ehan quet
en bet parfet hep arretaf
digacc dam miret dre merit
maz vezo guell dre he dellit
ha maz vezo cuit Nonita

nonita.

Me so gant cozni difiet
claff off meurbet voar an bet man
ach autrou doe so guir roe bet
mervell so ret ha compret poan
Pret eo lesel splet en bet man
he hol souzan epep manyer
he hol glachar ha he doare
ha seruichaff doe guir roe ster
Achiuet eo flam ma amser
hac em esper ez prederaf
muy nem goulen da chom enhy
pret eo deffri dispartiaf
Ma guir nouen a goulenaf
quent dispartiaf guelaff ve
ha bout pr[e]sant oingnamantet

ha gret oz roe bet ma trette
Monet assur beden cure
pe vn re a ve dereat
rac se hoantec me hoz requet
maz vizif nouet a pret mat

nuncius ad Curionem.

Me eielo breman haznat
eguit e querchat en stat se
ha me aia breman dan ret
maz vihet nouet gant trete

Ad Curatum.

Bon iour assur mautrou cure
duet a lech se na daleet
gant merit bede Nonita
hoz goulen a gra a tra net
Rac se monet maz ententet
he deueux hoantet a credaf
duet de guelet na tardet muy
pret eo ganti dispartiaff

parochus.

Cza beleyen certen pan ordrenaf
deomp de guelet parfet pa hoz pedaff
de consolaf ha de visitaf net
cuf hac vuel ha santel de quelen
an leanes courtes dan enesen

rac he nouen a goulen ententet

presbiteri.

Oll ny aiel, tut santel de guelet
an guir sanctes Bretones expreset
meurbet dihaet ha claffet ezedy
pa hon goulen euel hen quemenet
eguit he prof gant cof he bout nouet
duet eo he pret maz eo ret decedy

curio.

Dez mat deoch glan en ti man
leanes duet omp apret doz guelet credet spes
digoar an maes certes en hoz esper
moz guel dihaet ha ponyet en bet man
dirac hon drem leueret lem breman
doare hoz poan hoz souzan hoz manier

nonita sine cantu.

Dam bezaf nouet hoz pedaf
beleyen guen hoz goulennaff
dispartiaf a menaf sur
hac ozoch spes ez confessif
ha presant maz sacramantif
voar pen maziff maz viziff pur

pr. sil.

My gray an dra se dre aeur
pan eo graet e stat gant natur
ha deuet eo an hent assuret
ha presant hoz sacramanto
dre guir reol hoz absoluo
ha hoz nouo pan vezo pret
Hoz testamant a goarantet
pan aedouch breman voar an bet
a ordrenhet pa hoz pedaf
gret hy rac hoz drem a breman
ha leset hol splet an bet man
pan aedouch aman dianaff

nonita.

Ma enef da doe guir roe bet
ma corf dan doar preparet
a vezo laquet poz pedaff
hac an peouryen ho souteny
peuch e pep stat hep debaty
da pep heny a suppliaff
Me men dre boas mamen croasaf
pidif roe tron dam pardonaf
cridif a graff gant guellaf pret
guerehes mam Jesu mez suply
vsaff a gracc aduocazcy
ach guerches mari beniguet
Euez ma ael mat gant stat net

me hoz requet a coudet mat
maz vizif graet francq am anquen
ha mazif dan effou louen
da hizuiquen da louenhat

mors eam occidendo.

Me eo an ancquou dan tnou man
a iaz discascun ma hunan
quement en bet man a ganer
terrian gentil hac ylys
bourch gant enoe hac an ploeys
oll dre maz quis ez punisser
A pep sceurt noeant tout antier
me groa diampeig ma mecher
e pep amser ma materi
ne douigaff tourmant na scandal
ha drouc ha mat han hol chatal
universal hep contraly

(Et occidit.)

Huy leanes gant courtesi
duet eo hoz pret da decedy
diabri eon couclusion
nedoff oz nep re disleal
me hoz scoy patant voar an tal
dalet taol real en calon

deus pater in paradiso.

Mma aelez glan it breman oz an tnou

querchit de ja Nonita dan yoaou
gouden poanyou da bout hep gou louen
maz duy certen dien dan leuenez
ma guir sanctes ma guir leanes rez
hep nep finuez dan guir leuenez plen

angeli.

Deux Nonita na esma quet
beden trindet gant appetit
achiu eo dinam da amser
deux dreist an ster gant cals merit

(Et portatur ad paradisum.)

Dit ezeo reson an gonit
ha cals profit da accuitaff
deux bede an les celestel
dan baradoes hel vhelaff

vicini, presbyteri et alii.

Ny a crethe parfet decedet ezedy
breman an leanes leun spes a courtesy
he lienaf dezy a ve expediant
hastomp na tardomp quet duet eo pret hep quet nam
vaillant gant carantez enbez a neuez flam
anterin ha dinam greomp an enterramant

presbyteri et clerici.

Entre an nou men bras
a choas a vn assant
quezcomp hy tra diuin
ha din incontinant
ha so vn lech vaillant
plesant ha pligandus
E douar riuelen so certen ordrenet
ez hanuat an placc man gant an anciendet
gant an tut so reputet so bepret quenedus
An placc man a hanuer
he ker deliberet
hac ez graher dezy
lech ha ty raliet
ha maz vezo pedet
bepret a coudet spes
Dirinon ez hanuer dezi ker reverant
ha chapel hac ylis fournis a parissant
dre mazeo bed vaillant ha prudant ha sanctes
Enterromp hy aman
corf glan an leanes
tost dan mor armoric public guyzuyzigues
ema dou hanter spes e placc aes an deserz
he eneff net gant doe diuoe so guir roe ster
he corf so enterret parfet a coudet scler
entre Doulas a scler ha ker a Landerneau

Sequuntur post mortem miracula.
senescales.

Me so den a laes senescal
a mir oz tourmant ha scandal
ha leal didan ma goalen
a delch onest ma maieste
mes fectouryen toueryen doe
me goar an re se ho quelen
Rac se sergantet moz pet ten
jt da emban en vn banden
an breuiou ten han laesennou
maz disclerhier pep materi
ha dre scrit aduertisydy
eguit donet dy diziou

notarius et apparitor.

Cleuet huy tut an statudou
a queffren hep faut an autrou
voar pen diziou dez rauet
ema hep gou an breuigou bras
gouzuizit ha na tardit pas
nep en deueux cas so tasset

notarius citando homines.

Te herri ha te julian
ha riuoall ha te alan
ha huy moruan ha tephany
setu flam hoz auiornamant

voar pen dizion peur cougant
hoz em quifit presant ganty

judex.

Me dan clezeff lem em memor
a justicc mat plat em cador
nedeo disenor dam orin
ouz vn clezeff e pep queuer
vn barner mat hep net atfer
a haualier etren guerin

De gladio.

Don lem don plat hep ren tatin
da pep dezef fin continant
ha croas ha becq da prezec pell
lech dorn ornet mar mennet bell
hac vn pomell guell excellant
An becq anezaf quentaf plant
a siniffi pep quis puissant
pep barner reuerant antier
a dle bout poingnet a fet licc
a calon just auber justicc
ha bout dimalicc officer
Dren lem quentaf hep chen chaff guer
a deffri ez signifier
ez dle pep barner mecher plen
hac auber justicc propicc flour
hep arretaff na douigaff gour
disaour dan mes faectouryen

Hac an eil lem dre guir quemen
A sinifi ez dle dien
sicour an peuryen souten ve
haff ha gouaff hep douigaff gront
oz an re creff, no deceffont
na no foulont e nep montre
An plat a dref an clezef se
a sinifi net gant trette
penaux dreist pep re ez dleaff
bezaff bouzar ouz meurare
hep bout hegredic do rigne
pisaar mar be ez falle scaff
An plat arall ne fell brallaf
a sinifi dren publiaff
ez dle bezaf an quentaf dez
ha cuff hac vuel euel quent
ha delcher hir voar an guir hent
hep foulaf nep meut e hentez
An croas assur pan yscurez
a sinifi hep fazi pez
ez dle bezaf fez anezy
mat ha ten enhaf quentaff can
ha reif e guir dibilif glan
da pep vnan hep souzan muy
Lech an dorn ornet a detri
dre mas astrif a sinifi
ne dle nep remsy variaff
na gouzaf nep stat laquat gou
e lech guir dre stir a guiryou

eguit aruoazou de plouaff
Mar deu den de sourprenaff
dre aruoaz(r) marzus e rusaff
a dle dezaff e drastaff prest
E dorn sornet a coudet jen
e banissaf hep douigaff den
na mar groa quen ez men en rest
An pomell excellant an test
a signifi quen manifest
an tut oneet dren arhuest cant
ez dle bezaff hep chenchaf cher
prudant, constant vaillant antier
hep bout nep queuer azerant
Me ne grif quen bede menell
tam an draman e nep banel
a diabell memeux sellet
da auber justicc, propicc mat
voar an douar peur hegarat
da pep stat ameux relatet
Delchomp an laes gant onestet
tut hegarat aduocadet
ha huy noteret an pret man
greomp an guirionez anezi
ha lealtet hep arrety
dan bras deffri ha dan binan

Et vocantur.
primus advocatus.

Gueluet herri ha Julian

secundus advocatus.

Presant ynt rac drem a breman

primus advocatus.

Comset aman na ehanet
descuezet herri hoz libell

secundus advocatus.

Setu didan an siell
ne vihet quet pell oz sellet

primus advocatus.

Aman hoantec ezeux dec scoet
ha so gant Julian manet
anedindy duet guenede ?

julianus.

Nemboe quet dram fez anezeff

primus advocatus.

Ma lauar gaou a te prouffe

henricus.

Na grahen quet rac scecret voe
[me] ho prestis en vn ylis ploe
dezaff men re voar e le doet
mo goestlas, dezi alies [da sancta Non]
eno me carhe ma be aes
voar bez an sanctes expreset

judex ad Julianum.

Pe leueret huy Julian
a hui entent lem a re man
comset breman hep souzauy
voar bez an sanctes gant meste
oz herri huy a fazihe
a huy a toehe noz boe y

julianus.

Ya tiz mat hep laquat sy

judex.

Bezet fier an materi
vn tra braseo ho fantasy
e sotoni mar faziet
bezout laetet etren bedis
ha coll an glat an paradis
ha bezout exquis banisset
Aman duet hoz daou da touet
voar bez Nonita a tra net
me az guel mezet hac oz doetaff

julianus permeando.

Breman voar ma stoe ez toueaff
voar bez an sanctes expressaff
bezcoat nem boe scoet nen doetaf
digant herri ne faziaff

Et recedit.

Me aia a breman dan kaer
da Herri ne dleaf diner
ma mecher so deliberet
egaou en toeys en quis man
meruell a graff ne caffaf span
gant oun ha poan na ven daff net
Meruell a graff nen nachaf quet
ha ma doulagat quen badet
ret eo diff apret arretaff
difaecon hac un sofony
dre malicc bras ha fantasy
voe diff oz herri faziaff

Et moritur subito.
secundus advocatus.

Mazeo Rigoal hac Alan

primus advocatus.

Hep estlam setuy aman

secundus advocatus.

Petra a fell dihuy a Rigoal

primus advocatus.

Rac Rigoal a dle da Alan
vn res leal a segal glan
ho goulen breman voar an placc

secundus advocatus.

Rigoal a te a dle dre gracc

lauar breman dirac an facc
pa ez eux spacc voar an placen

rigoal.

Me lauar rac drem a breman
ne dleaff mal na segal glan
na tra da Alan nep manier

advocatus alani.

Alan a te proffe an guer
nac an rebeig nac an mecher
col a grez fier manen grez

alanus.

Eguit nep pen ne proffen quet
me ho ros hoantec e scecret
ne gray quet ledoet a credaff
me crethe Rigoal ez falhe
ne gallaf proff entouhe
mar carhe men rohe dezaff

advocatus alani.

A te touhe tam an tra man
breman da Alan ep manier

rygoall.

Ya tizmat hep nep atfer

advocatus alani.

Voar bez an sanctes ez exper
a dirac cadarn an barner
ez disclerhier an materi

judex.

Entent Rigoaïl mir na filli
na jscur na na pariuri
en punissiff mar faziet
mir na gruy da damnation
eguit madou bet macret don
heul an reson han guirionez
Gorre da dorn glan voar an bez
neuse lauar da digarez
rac se porz mez mar compsez gou
chenchet eu liu voar da diu guen
rac na ves public bizuiquen
allas den serr da guenou

rigoal.

Men toe rac ma drem a breman
nem boe netra digant alan
na segal glan na nep danuez
ennaff breman eo ema goall
comps sotony eux a Rigoall
rac maz eo den fall didaluez

Et recedit.

Alianen cren me men tenno

hoaruez et rez a hoaruezo
me sanct an dro diff oz donet
me so reusedic bizuiquen
disleal euel vn goall den
rac toet yen so ancquenet
Me so e cals lastez coezet
ma deuesquer so leheryet
ma diu brech sechet seizet oll
toet disleal da Alan
maz of coezet en cleffet man
reputet da poan ha dan coll

primus advocatus.

Guiluit Moruan ha Teophany

secundus advocatus.

Orcza a pep tu setu y

primus advocatus.

Leueret gant enor Morvan
petra a mennet an pret man
hoz hunan digant Tephany

morvan.

Me ros dezi rez da nezaff
vn poes lin a detin finaff
pa en mennaff nen caffaf quet

advocatus theophanæ.

Orcza Tephany studiet

a huy oz eux eff enez nezet
na dibunet en hoz mettou

theophania.

Nem boe netra eux e madou
na lin na stoub na diboubou
heruez e compsou e gouyat
nem boe e gloan nac e canab
vac e mecher eo auber goab
eguit estrab ne arabat

advocatus morvani.

Morvan ne deux nep diougan mat
hy a lauar ezeo barat
dont da brutat da coll madou
a huy proffe quet dre detin
dre den na pep na dre nep sin
ez rosech lin de yuynou

morvan.

Nen prouffen quen dre nep metou
mar car touet voar an fetou
voar an relegou hep gou quet
me carhe gouzout quet goude
pe me be ma tra pe nam be
pe coll an tra se mar be ret
Cleu Thephany expedy net
sede so hep mar lauaret

oz touet a te em doeto
alan so breman souzanet
mar quell e lin accoquinet
na paiur quet pe mez laedo

theophania.

Pan falhe cant guez em fez mat
ne touo vnhan haznat
nem boe ne glat nac e madou
me en touhe dirac e facc
nem boe ne gloan nac e lanfacc
aet voar e scoacc e fallacou

judex.

Laqua euez mar comsez gou
ezay da hol mat dan badou
rac se sezlou guell ve poues
laqua euez mat na vady
na re ehaffn na hem daffny
me pet Teffany alies

theophania perjurando.

Mentoe presant dre an sanctes
breman voar bez an leanes
elin nem boe pres da essae
nem boe e danuez da nezaff
euez an trase a toeaff
hA ANezaff eo ez groaff fae

Dolendo.

Ach goa me breman Tephany
so bet bet oz doen fals testeny
hac oz pariuri quen jffam
coezet e martir hiruout
poaz off breman gant an tan brout
ret eo diff par tout caffout blam
Dre ma proces me meux estlam
coezet e cleuet hac aet cam
maz galler ma blam ma tamall
mazoff e cals mez carezet
dre ma falsentez ha mezet
dre ma meschandet ha duet fall.



SANT DEYY.


(Nunc de sancto Davidagio.)
davidagius.

Autrou doe croeer an steret
a calon parfet ez pedaff
fournissaf expres ma desir
voar an hent guir ma jnspiraff
bezout baelec a allegaff
eguit enoraff guellaf pret
a caffen mar dre guir atis
hac e stil an ylis guisquet
Me a groay hoantec vn requet
an urz bepret a appetaf
me ya ahanen de mennat
beden prellat da relataff

(Ad episcopum.)

Autrou gant brut hoz saludaff
humplaf maz gallaf quentaf pret
dre maz ouch vaillant ha santel
duet off diouguel doz guelet

episcopus ad Davidagium.

Duet mat Davy ravizi net
euel den santel dam guelet
groa da rquet pa ez pedaff
goulen scler an pez a quiri
heruez ma gracc ma prelacy
ha dit men roy hep faziaff

davidagius.

Prellat parfet hoz reqetaff
ma consacraff hep tardaff quet
ma memoar eo bezaf cloarec
ha hoantec da bout beleguet

episcopus.

Deomp dan ylis pant out discret
maz vizi mist acolistet
sacr ha diacret a pret mat
goude me roy baeleguiez
dre guir reson ha guirionez
pan out dre fez a buhez mat

davidagius.

Autrou huec hoz trugarecquat
huy hoz maiestat a stat din
hac en hanu doe so guir roe bro
me a quemero hoz doctrin
Me astouo hep gou dan nou glin
en hoz quiffin dre queffrinez
durant sider an offeren
ma em bezo cren hoz bennoez

episcopus consecrando.

Quemer an guisquamant
en presant tout antier
podou hac alhuesou
hac an calizrou scler
breman ez consacrer
hac ez baeleguer net
en hanu an tat apret
mab net ha speret glan

Et fit presbyter.

Gaillard me az lardo
vn dro dren oleo man
achiu eo dit breman
an pez so diouganet

davidagius.

Bennoez anterin an trindet

autrou deoch bepret a pedaff
achiuet eo spes ma desir
a yoa hir oz ma inspiraff
monet ahanen a menaff
da consacraf celebraf sur
ha doen pep pris dan ylisou
dan collaichou lichou pur
bezout hoantec e pep lectur
ha prezec sur an scriptur glan
a griff certen dre cristenez
ha noz ha dez en buhez man

primus canonicus urbis legionum ad eligendum episcopum.

Kaer a legion autrounez
so breman e cals bihanez
hac en bro truez so cœzet
hon archescob garu so maru sur
vn arall choasomp entromp pur
dre vng auantur assuret

secundus canonicus dictœ urbis.

Choasomp Devy so beniguet
gant patrici proficiet
so vn den parfet a credaff
ha so vn den mat ha natur
da archescob a ve prob sur
so a crœadur an furhaff

tertius canonicus.

Pret eo deomp cren mont bed enhaff
bed menenian hep ehanaff
tizmat ha scaff hep tardaff quet
ema pep stat en abaty
fontet hep vicc gant patrici
drezoa deffri proficiet

Et vadunt.

Dezmat goulou a guir coudet
en abaty man breman net
duet omp doz guelet a detry
ha da clasq vn den nyn ezneo
ha da dez rou dre compsou beo
ha da comps en breff oz Devy

hostiarius abbati meneni.

Autronez certen duet en ty
ema doz grat en abaty
en e study hep faziaff
goude sider e offeren
ez vez santel oz hon quelen
duet euel hen bedec enhaff

canonicus urbis legionum.

Salud deoch Devy an muyhaff
joae ameux hel pa oz guellaff
comp deoch amennaf quentaf pret
aet omp abaff allas Davy

vacant eo placc an prelacy
an archescobdy diffiet

davidagius.

Duet mat ouch huy chaloniet
en hanu an trindet an pret man
ha huy certen ha pep heny
en abaty hac en ty man

secundus canonicus.

Hany dre gracc so digazcet
dober quen hoantec vn requet
hac ez och choaset credet sur
da bout deomp patron en hon grat
don jnstruaff da bezaf tat
ha quir prellat ha guir statur

davidagius.

Mar plig dichuy chanoniet
nam choasit quet pa hoz pedaf
an trase ne ve conseant
na nep presant nen consantaff

tertius canonicus.

Ne deux mecher a differaff
rac sascun an moez comunaff
eo hoz choasaff nen nachaf quet

legion glan galuet an kaer
hac an archescobdy fier
ret eo deoch scler he quemeret

davidagius.

Pardonit diff hac nen griff quet
rac din nedoff quet credet se
huy a caffo guell da prellat
hac vn den mat ha ma grat ve

canonici.

Huy he quemero gremo gre
pan ouch diuset gant trette
duet huy voar se na daleet

Et trahitur.

Duet da benige hiuiziquen
ha hon credit na compsit quen
non bezo certen den en bet

alius archiepiscopus eum benedicendo.

Dalet huy ingal an goalen
an baz pastoral eual hen
ha voar hoz pen an mitr quen glan
ha hoz benigaf quentaf scler
ha da archescob hoz ober
oll dren quarter hac en kaer man

canonici.

Breman joeuseomp entromp glan

nobl ha comun ha pep vnan
han metropolitan han bro
euez ha ny chanoniet
pan aedy Devy beniguet
breman parfet joaeusdet so
proficiet guel voa pell so
quent maz ganset parfet aedo
heman a reno en bro man
euez en bro ez vezo reiz
euit doctrina noz ha deiz
ha chrisqui an feiz en breiz man

davidagius.

An placc man aioa diouganet
ha dif detinet a credaff
ha servichaff doe guir roe ster
het ma amser a prederaff
E emenian ehanaff
a prederaff gant guellaf pret
ha so placc mat hac abbaty
hac gant patrici dediet
ne guelaf plen feunten en bet
digant roe bet me impetro
ha maz duy ten goazretdennou
ha feuntenyou a dinouo
Doe guir roe bet cals penet so
distro vn tro ouz an brois
rac mazint scuiz stancq gant langour
eux a dour ezint difournis

Et surgunt fontes.

Un maruaill meurbet dan bedis
dour so do diuis fournisset
mazeux ayen ha feuntenyou
digant roe goulou dinouet


MIRACULA.
coecus unus pro aliis.

Allas me so dall ha fallet
ha ma doulagat so badet
na guelet ne gallaf quet sur
na cuf na car nemeux goarant
ha nep an re so quen neant
mazeo truant ma auantur
Hogen vn tro me yelo sur
beden prellat a guir statur
ma droue anantur mar curhe
eff a guelo franc ma ancquen
maz roy diff goulou quen louen
me goar certen ez eo den doe

Cæcus orando.

Allas Devy mez suppliff cre
sellet ma ancquen heflene
supliet da doe guir roe bet
setu me quen du quen cruel
allas dan bedis pen ysel
ma em bezo hael ma guelet

davidagius.

Meaz guel ha dall ha fallet
doet guir roe bet raz remedo
eguit maz vizi dipisticc
antenticq me az benigo

Et recipit visum Cæcus regratiando.

A trugarez doe guir roe bet
setu duet diff hel hal ma guelet
pan off dan sanct em presantet
ha me gant Devy beniguet

unus claudus.

Memeux estlam mazoff camet
ha ma diuesquer leheryet
allas nemeux nerz da querzet
mazoff gant ancquen souprenet
Me yelo hep goal mar gallaff
bed sanct Devy hep faziaff
eguit ma em descuez dezaff
ha caffout vn mat digataff
Allas autrou a guir coudet
setu me cam ha drouc framet
ach ouzif truhez hoz bezet
ma sicourit pan guillit net

sanctus davidagius.

E guidot Jesu men suppli

maz founy da nerz mazquerzy
pan eo debil da ysily
in nomine patris et filii

claudus.

A trugarez doe guir roe bet
setu duet diff nerz da querzet
pan off dan sanct em presantet
ha me gant Devy beniguet

leprosus pro aliis.

Gant ma lofrnez me meux mez bras
fromet ha fall dre goall allas
ha poaniet bras dre an cas man
me yel bed Devy continant
rac me a crethe ez ve sanct
da mem recommant ha gant poan

Ad Davidagium.

Sellet rac hoz drem a breman
pebez ancquen so dan den man
na pebez tan a goez an bet
porzit ardant gant carantez
allas a pep tu ma buhez
hac oziff truhez hoz bezet

davidagius.

Me az guel scuiz ha castizet
ha loffr meurbet ha penedour

mez benig breman voar an ploe
maz sicouro doe an roe flour

leprosus.

Setu me graet franc am langour
dre guir amour ha recouret
dre gracc sanct Devy settuy aet aet
eo digueneff ma cleffet

febricitans.

Me so gant terzien ancquenet
ha hy quen jonisc, ne quis quet
oz crenaff bepret ezaedouff
rac se bede Devy eziff
sur ez eo sanct a seblant diff
hac en pediff pan duy diff coff

Orando.

Sanct Devy suppli eguidoff
e penet meurbet ezedoff
ha rac se ez troff daz coffat
gant an terzien yen oz crenaff
hac an ancquen oz ma benaff
quen sembl ezaf ne gallaff pat

davidagius.

Me az guel gant terzien ancquenet
rac se guir roe bet a pedaff
maz vizi francq a pep ancquen

ha lesel certen e crenaff

Et sanatur Febricitans.

Doe hoantec a trugarequaff
jachet off scaff hep tardaf quet
terzien na nep reux nemeux muy
dre sanct Devy renunciet
Nep so e cals leff gant cleffet
bezet visitet en bet man
ha maz vezo scaff ha caffou
ha ho hoi poanyou ho souzan
ha loigaff scascun pep vnan
mar bez e souzan didan kaer
dre caret doe rac non be blam
maz vizimp dinam pep amser

pauperes simul.

Deomny guitibunan dan kaer
pan hon eux bed spes hon esper
bennoez roe tron sider ren preseruo
da reiff dezaff rez buhez mat
rac mazeo hep mar hegarat
an guir prellat ra pell pado

Legenda.

Obiit sanctissimus urbis Legionum archiepiscopus Davidagius in Menenia civitate intra abbatiam suam quam præ cæteris suæ diocesis monasteriis dilexerat quia beatus Patricius qui nativitatem ejus prophetaverat ipsam fundavit dum enim ibi apud confratres suos moram faceret subito languore gravatus defunctus est et jubeute Malgone Venedotorum rege in eadem ecclesia sepultus. Hæc et quam plurima alia de libro qui de gestis regum britanorum nuncupatur de sancto Davidagio et sancta Nonita addidimus.

davidagius.

Me sanct ma fin determinet
cleuet so duet hac ez credaff
Me soing en mat hep laquat sy
pret Eff da Devy dispartiaff
(*)
En abbati ez studiaff
finuezaff dre mazaff claff
pan aedoff dre gracc en placc man
en kae a menenian hanuet
ha hui ma breuder a cher net
a breman parfet hoz pedaff
dercher (delcher) guir fes carantez mat
entroch peuch mat eo a grataff
Ha presant ma sacramantaff
ma tretaff ha ma noeaff net
pan ay ma speret an bet man
maz vezo glan pan duy an pret

fratres.

Autrou prelat pan relatet
breman parfet ni hoz tretto
a roy deoch flam pep sacramant
en hoz presant hoz contanto

mors.

Me eo maru yen hep soutenancc
ne groaff en bet man contanancc
mo digacc dam chancc hep ranzcon
me a meux dren bet vn edit
mo digacc dam liam dam git
autrou neday cuit nac ytron

pater familias.

Ma merch ma mab e drouc abri
debil ha vil a ysily
ha glisi en ho goaziet
da Devy me a supplio
ha hep nep molest ho goestlo
ha diff me coruo vezo net
Allas Devy sanct beniguet
ma bugale so effereet
moz suppli parfet gant creden
hep quet a mar dre hoz caret
e mazint ha moan ha goanet
(*)
Dalet ed yt e queffridy
ha huy ha huy bras ha bihan
ouzech glan pa noz eux danuez
emeux truez an bloazuez man
Nep so prisoniet en bet man
na nep so e cals poan manet
auber an auancc ho ranzcon
maz vizint don di prisonet

mors.

Pa ho quiffifaes e chaeson
dre gourchemen doe guir roe tron
gant ma bourdon ho estonaff
na fizi quet aman bed an hoaz
rac pan aff dren bro me so noaz
hac a goar a baz ho lazaff

Et occidit Davidagium.

Ha huy Devy pan studiaff
na deu mar sanctel hoz guelaff
ret eu gouzaff hep tardaf quet
me mem caffo dirac hoz drem
ne souyt quet ne tal quet clem
dalet vn taol flem hep remet

davidagius moritur.

Autrou Michel te han aelez
ma sicourit rez em ezomp
in manus tuas domine comendo spiritum meum.

deus pater.

Gant carantez ma aelez mat (net)
e breiz ysel gant vuheldet
ezeo decedet an pret man
yt huy breman gant letany

carguet parfet gant meledy
da querchat Devy dan dipoan

angeli.

Sancte Devy deux dan dipoan
gueneomp breman dan letany
goude da poan da huanat
bede doe tat maz ebaty

angeli representando animam in paradiso.

Aman hep finuez ez vizi
glan en letany devi mat
dien hep ancquen nac enoe
e les ati roe dirac doe tat

monachi in abattia.

Setu decedet en pret man
an archescob mat prellat glan
ha ny so breman souzanet
he man aioa goar hegarat
hac a tost ha pell guir prelat
presant so sanct mat relatet

rex.

Me malgon roe venedotonet
a goar en mat a relat net
entren preladet en credaf
sanct voa heman a pan ganat
dre patricc e proficiat

ezeo sanct mat hegarataff
En abatti ez studiaff
pret eo e berr e enterraff
hac ez gourchemennaff affet
dre mazoa vaillant ha santel
dre testeni celestiel
haff cuff ha vuel reuelet

fratres, canonici, presbiteri, nobiles, etc., simul.

Rac se hastomp na tardomp quet
pan eo deomp cren gourchemennet
gant an roe parfet a credaff