War dôn : Disul vintin pa oan zavet (bis)
Tri gavalier la du ron don,
Moa rankontret lan lu ron.
An de-all ec’h is gant ma gwall
Da besketa, ’bord ar c’hanal.
Da besketa trese Lan-Bern,
Lec’h ’zo pesked, pesked, eur bern.
Pesked alaouret, pesked flour,
O filostal ebars an dour.
Eun tammik hini a dapiz,
Oa ket brasoc’h eget ma biz.
Un’ e tapis, bihan bihan,
Hag hen berr berr, munut ha moan.
Un’ yaouank, un’ yaouankik c’hoaz,
Gwell vije bet ganin un’ braz.
Ar paour bihan, ar paourik kez,
A lavaras d’in en e yez :
« Me ’zo re vihan, ma leusket,
« N’eus ket diouin eur c’hinaouet.
« Pa vin deut braz, c’houi am zapo,
« Pa vin deut lart, c’houi am lac’ho. »
D’ezan kenkent e lavariz :
« Mad oc’h, gwell vad er c’horaïz.
« Deut em zac’h, nag e vec’h bihan,
« Kalz eveldoc’h a rei eur goan.
« Tammou bihan hag alies
« A garg ar c’hof, nag eo dies.
« Pesked bras, re vihan, re grenn,
« ’Zo mat d’ober eur fritaden.
« Gwell e pesk bihan er gôter,
« Eget un’ braz, un’ braz er ster.
« Emzavoc’h eo eur c’had tapet
« Eget eo diou, diou o redek. »
An Eün.
