En ærieu pé officeu


CHAPISTR EIHVET.


En ærieu, pé officeu.


ER verdér ha hoéreset e larou bamdé en office e lar en dut a Ilis, de laret-é, Matinizeu, Prim, Tierce, Sext, None, Gospereu ha Compli.

2.° Er-ré ne ouzant quet leine, pé n’en dou quet oar d’assistein én Ilis de laret en officeu-zé, e larou ahoel én ou léh deuzec Pater noster, etc., eit Matinézeu, ha seih eit en ærieu aral.

3.° Int e larou Credo in Deum, etc., quênt Prim ha goudé Compli, hac ur uéh en dé er Miserere, mar er gouyant, hac a p’ou dou manquet, int e larou tair gùéh Pater noster, etc.

4.° Er-ré clan e vou exant a office, mar carant.

5.° Durant coareis sant Martin ha hani Pasq, int e assistou é Matinézeu e larér én Ilis, mar guellant.

Explication.

A p’en dès en Eutru Doué hun hrouéet ha laqueit ér bed, ha mé ma hemb cesse é obér vad demb, é ma just ma vehemb hemp cesse doh en trugairécat ha doh er mêlein. Mæs er grechénion ar en doar n’ellant quet er gobér dalhabl èl er Sænt e zou én Nean ; ret-é ahoel ma impléeint lod ag en dé guet en devér-zé, de vêlein ha d’adorein brastet ha madeleah Doué.

El-cé en dès groeit en dut santel a bep-amzér. Er Roué santel David, deusto ma oai occupet guet er sourci hac en affærieu ag é ranteleah, e hum dennai seih gùéh én dé én é gambr a beden eit mêlein Doué.

Doh scùir er Roué santel-zé, ha dré inspiration er Speret-glan, en en dès gourhemennet en Ilis d’er-ré e zou ou stat pedein ha mêlein Doué, laret seih office bamdé ; en officeu-zé e zou hoah hanhuet ærieu, rac ma hés unan eit en noz hac er ré-ral peb tair ær ag en dé. Cource Matintézeu é creis noz, èl ér hommancemant ag en Ilis, ha hoah hinihue en dé én ul lod-vat a gouvandeu, Prim de sàu heaul, Tierce de nàu ær, Sext de greis-dé, Non de dair ær, Gospereu ardro cuéh heaul, ha Compli de dihouélat. Mæs ellein e rér commancein Matinézeu a anderhue a p’en dé tostoh en heaul de guèh eit de greis-dé, pé ou lezel bet en trenoz, ha dégoursein en ærieu aral, meit ma veint laret én dé merchet dehai. Neoah n’en dé quet hemb ræzon en en dès er Sænt a uéharal hac en Ilis merchet ou hource dehai, ha n’ellér quet gobér gùel eit en héli a guement ma ellér. Doh ou laret é ma pourfitabl chonjal ér poéndeu a Bassion hac a Varhue hun Salvér arrihuet d’er hource ag en office e larér, èl de Vatinézeu én é nozeoh deuéhan er jardrin Olivet, stleiget a énou de Jérusalem é ty Anna ha Caïf ; de Brim, ér péh en doai anduret é ty Pilat, flagellation, curunet, anjuliet, juget é gueu ; de Tierce, a pe oai é tougueïn é groéz d’er Halvér ; de Sext, pé oai tachet én-hi, de Non, pe oai marhuet, d’er Gospereu, pe oai disquennet, de Gompli, pe oai interret. Er chonge ag er poéndeu-zé e gresq en devotion hac e arrest hun speret posettoh. Office er-ré ne ouzant quet leine assès e zou en nombr ag er pedenneu merchet ér chapistr-men. Int e zeli ou joéntein doh office en Ilis, ha hum gomportein just èl er-ré el lar. Eit quement-cé en en dès sant Françæs ordrénet d’er verdér ha hoéreset a Urh er benigen laret office en dut a Ilis, pé ma n’ellant, laret Pater, Ave Maria, guet Gloria Patri, quel liès a uéh èl mé ma merchet ihuélloh.

Revé custum mad hilleih a verdér, é ellér laret office er Uériés é léh office en llis pé er pedenneu, én ur laret ér fin un De profundis eit en ineanneu ag er Purgatoér. Èl mé ma obliget er verdér de rein en exampl vad d’en ol eit ou douguein de chervige Doué, int ou dou sourci bras a assistein én Overen-bred hac én instructioneu a ou farrès.