O hui e chom én néan, cannet guet mêlodi,
Én dé-men a driomfl eid hon Rouannès Mari,
Én dé-men m’en dès bet, arlerh er marw douçan,
Er Mab sàuet é Vam ar en trôn ihuellan.
Guérhiès, nag a vadeu ar-n-oh en dès scùillet !
Quement tra zou én nean eid oh zou displéguet :
Er Mab e hoès cuhet étré hou tigosté,
Ar un trôn ligùernus hou sàu hinihue en dé.
Idan seblant un dén nezen en hum guhé,
Hinihue é huélet splan hou Salvér hag hou Toué :
Hui e hoès er mâguet guet fréh hou calon pur,
Ean hum ra d’oh ean-memb hinihue eit mâgadur.
O brasset ur bouvoër e hoès-hui bet guet Doué !
Péh græçeu ar en doar ne scùillet-hui bamdé !
Én nean a drest er Sænt hag adrest en Ælèd,
N’en dès a drest hou trôn nameit trôn en Drindèd.
O hui zou azéet étal hou Mab Jesus,
Rouannés, hur cheleuet a hou trôn ligùernus ;
Hui hur hâr, Mam tinér, ni zou hou pugalé,
Hag hou Mab, ô Gùérhiès, e hra hou volanté.
Gloër d’en Tad en dès bet choéget er vam santel,
Gloër d’er Mab en dès bet hi sàuet quen ihuél,
Gloër d’er Sperèd-Santel en dès hi goarnet glan,
Hag inour de Rouannès hag en doar hag en nean.
