Kadarnaet eo bet ar bajenn-mañ
BUEZ ARZUR A VREIZ
————
Trajedien e pemp arvest, tennet eus histor Breiz
gant KLAODA ar Prat « Pluenzir »
ARVEST KENTA
————
Doare an teatr. — Eur zal eus palez an dug e Roazon. — En dounder, porchedou ; war ar c’hosteziou doriou gwirion a c’heller da zigeri. — En tu kleiz e treser eur gador evit an Dug. — Skouejou dijentiled Breiz a zo renked en-dro d’ar zal.
————
KENTA DIVIZ
KEROMAN, OLIER, FLOC’HED, Servicherien.
(Pa zaver ar ridoj, eur mevel bennak a ehan da zresa kador an Dug ha da gempen ar zal).
KEROMAN
Renaod, ha c’houi, Hug, ledit ar pallen-ma war bazennou an trôn, ha taolit evez ma vo kaset ar bokedou da zal ar fest. (Da Olïer o tant er zâl dre an nor zeou.) Hag oud dizro, va mab ?
