Adlennet eo bet ar bajenn-mañ
— 14 —
KEROMAN
N’ouzon dare. Ar pez a zo gwir eo penaoz epad m’edot o kuruni hor mestr, ez eus deuet eur c’hannad da zigas ar c’helou d’an dug Arzur.
LOHEAG
Va spered a zo enkrezet… Aon am eus…
ROHAN
Aon ?
LOHEAG
Ya, aotrou, ha ra blijo gant Doue e tigouesfe ganen fazia !…
ROHAN
Bezet ar vadelez, aotrou kont, da lavaret d’eomp ar pez a zonjit.
KEROMAN
Va digarezi a refet, aotrounez, rak emeur ouz va gortoz e sâl ar fest. (Da Olïer.) Deus ganen. Olïer. (Mont a reont dre gleiz)
OLÏER HA KEROMAN
Salud d’eoc’h, aotrounez !
TREDE DIVIZ
ROHAN HA LOHEAG
ROHAN
Komzit, Laou, me ho ped, perak hoc’h-hu enkrezet ?
