Adlennet eo bet ar bajenn-mañ
— 23 —
PEMPED DIVIZ
An hevelep re, eur FLOC’H (o tont a zeou).
EUR FLOC’H, o tont er zâl.
Aotrou, an dug Yann, hoc’h eontr, a c’houlen koms ouzoc’h.
ARZUR
Ho pezet ar vadelez, aotrou Rohan, da vont da ziambroug va eontr ; digasit anezan aman, ni e zigemero er zâl-ma. (An aotrou a Rohan hag e floc’h, ha daou pe dri soudard a ya kwit dre an tu deou.) C’houi, aotrounez Loheag ha Malestroa, it dre dour an hanternoz, ha livirit d’am fobl karantezus e tigemerin anezo dizale em lez. (Loheag ha Malestroa a ya dre an hevelep tu.) C’houi, va den mad Keroman, a ziskargo gant largentez gwin ha chistr mad d’am holl sujidi e porzou ar c’hastell.
(Keroman, Olier, Soudarded, Floc’hed ha Mevelien a ya kwit dre an tu kleiz.)
C’HOEC’HVED DIVIZ
ARZUR, LAN a ZINAM, HERVE a LEON, GUIOMAR, ar REIER, DIJENTILED.
LAN A ZINAM
Pe seurt abeg, aotrou Arzur, a c’hell kaout an dug Yann-Dileve o tont hirio d’ho lez ?
