Hag he ziskib an tad Maner,
Manac’h santel, gwir brezeger.
E Leon e talc’h an dud bepred d’ho Brezonek,
Vel ma chomm ar brennik en aod ouz ar c’herrek ;
Karout a reont ivez ho bro, ho farkeier,
Evel goenvi a reont pell dioc’h ho lanneier.
Ar baotred yaouank a vro Leon
A zo enkrez en ho c’halon,
Pa rankont, siouaz ! dilezel,
Ho farrez, ho bro Breiz-Izel.
Leoniz a ia bep bloaz gand feiz d’ar pardoniou,
Evel ma ’z ea gwechall arozho ho zadou ;
Ar c’hustummou santel euz eur rum d’egile
Koulz hag eun digouez sakr a dremen e leve.
