Eur c’hastel braz ez euz, e kreizik koado Mal ;
Ha dour doun tro-war-dro, ha ’peb korn eunn toural :
Hag er porzlec’h eur puns hag hen leun a eskern,
Hag hueloc’h-huel bemnoz a gresk ar bern.
Ha war sparl ar puns-ze ar vrini a ziskenn,
Hag ho boed a glaskont, o voakat laouen.
Pont ar ger a gouez eaz, hag a zav easoch c’hoaz ;
Piou-bennag eza tre na zeu ket mui e-meaz.
Chentilla marc’heger dre zouar a Zaozon,
Eur baleer iaouang hanvet Iann Pontorson.
War ar pardez d’ann noz pa’z ee e-biou ar ger,
Digand ar penn-gedour e c’houlaz digemer.
— Diskennet, marc’heger, diskennet deut enn ti,
Ha likit ho marc’h gial e-barz ar marchosi :
Hag heiz ha foen he walc’h a gavo da zibri,
Keit ha ma viot ouz taol o koania gan-e-omp-ni. —
Ha tre ma voa ouz taol o koania gand ann dud,
Na leverzont mui ger, evel pa vizent mud.
Nemed d’eur plac’h iaouang : — it d’al lae, Biganna,
Da zevel ar gwele d’ann aotro marc’hek-ma. —
Hag evel ma oe pred da vonet da gousket,
Ar marc’heger iaouank da gousket e ma eet.