Adlennet eo bet ar bajenn-mañ
X
AR C’HAKOUS.
(Ies Treger.)
ANN DEN IAOUANK.
O Krouer ann nenv hag ann douar !
Mantret va c’halon gant glac’har,
O kounan enn noz hag enn de
D’am dousik koant, d’am c’harante.
Me zo war va gwele chomet,
Dalc’het, sioaz ! gand ar c’hlenved ;
Ma ve va dousik a zeufe,
E berr-amzer am frealzfe.
Evel gand ar werelaouen,
Goude eunn nozvez a anken ;
Mar zeufe ma dous d’am gwelet,
E venn gant hi dizoaniet.
Ma lakafe beg he geno
War bordik skudel va louzo,
Da evan goude p’az affenn,
Gweleet raktal e vizenn.
Ar galon a poa d’in roet,
Va muian karet, da viret,
N’em euz kollet na distroet,
Na laket da uz fall e-bed ;
Ar galon az poa d’in roet,
O va dousik koant, da viret,
Em euz mesket gand va hini ;
Pini da hini, va hini ?