Ma Doue !… Petra zo ?… Setu me dihunet,
Ha diwar ma garrek war an douar ruilhet…
Oh ! nag ez eo c’houero bue ar paourkez den,
Netra ’med eun hunvre ma fardon na oa ken !
Siouaz, red eo kredi pa gomz ar wirione.....
Bet ez on er Yeodet enpad ma c’housk-kreiste ;
En avel eo nijet ma hunvre alaouret,
Gantan ez eo tec’het pardon ar Goz-Yeodet !
Kâvet ’m oa ma frankiz ha kollet ma hual,
Aman on adarre ma-unan o sonjal…
Bet am eus plijadur, kalz a evurusted :
Vad e ra d’eur c’hlanvour eur pennadig yec’hed !
Hunvre kaer ha dispar… O pardon binniget,
Bepred me da garo, da veulo… O Yeodet ! ! !
