Setu aman breman an comanant
lesel an bet a renquet competant
aour hac argant han hol paramantou
ha mam ha tat ha pep stat relatet
hac hoz querent da pep poent ententet
ha renoncc net da splet an pechedou
ret vezo iun, ober alusenou
dirac roe tron ober oresonou
dren vertuziou deuotionou bras
pichirindet bepret da compret poan
mintin ha nos gourtos hep reposuan
entet glan a breman deomp an cas.
Contant of net bepret da compret poan
Joa ameux glan pa hoz eux diouganet
me he dougo vn dro hac em profit
a guir amit hoz eux dif recitet.
Deux gant merit ez profit Nonita
mez benig glan breman hep ehana
ha da guisquaff dit gant ioa an abit
mir dif courtes hac exspres an lesen
desq an psaulter ha quae dan oferen
breman a cren me a gourchemen dit
