Adlennet eo bet ar bajenn-mañ
« Cheleùét konzeu Doué. » Eh an, Mé, de gemér,
Bar Joseph, hag e zo é dorn men diouganner
Mé her stages de var Juda. Elsé vennan.
Hag en neu dam koed-sé ne rint mui meit unan.
Etré er pobleu all é mant devaté oeit
Ha mabed Israël, un disparti vo groeit
Tud Jacob, me Spered e rédo d’ou dastum
Hag ou zolpo kevred ar ou douar, én ur rum.
Ar mañnéieu ou bro, én amzer de zonet
Ind e chomo dalbéh staget hag unanet ;
Eit ou rénein, ne vo naméit ur roué hebkén,
Mem benoh e vo arnehé de viruikén...
Aman é tévéa diougañn en Diougañner.
Es é gout, ne gonza meit a dud é amzér ;
Meit mé, a pe lennan diougañn bras Ezékiel,
D’id bepred é neija me chonj, o Breiz-Izel.
