Eul laer ?
Ia, eul laer. Piou eo en deus pareet ar bugelig ? Piou ac’hanomp ?
Te eo, her gouzout a ran kerkouls ha te.
Neuze an arc’hant se a zo d’in. Ro ar yalc’had.
N’he roin ket.
Ro ar yalc’had dioc’htu, ma ne fell ket d’it ez in da gerc’hat an archerien. Perig a ro en eur c’hrignouza. Mat ; me am eus eun tamm truez ouzit evelato ; ranna a rin an arc’hant etrezomp. Digeri a ra ar yalc’h ha kounta an arc’hant. Sell ! tri rollad mil lur. Setu da loden, eur rollad mil lur.
Petra leverez ? Mar d-eus tri rollad mil lur, n’em eus ket awalc’h gant eur rollad hepken. Dleet eo d’in eur rollad hanter, p’eo gwir ec’h eus lavaret e vije daou hanteret etrezomp kemend a c’hounezfemp.
Ne ket evelse eo e kountan me, Perig.
Ha penaos e kountez neuze ?