Pajenn:Goasdoué - Kanaouenno en yez Treger.djvu/9

Adlennet eo bet ar bajenn-mañ


EUR GIR AROK
————

Ar c’hanaouenno a lenfer el levrig-man a zo bet, an darn vuian anê, moulet en Kroaz ar Vretoned. O dastumet em eus, ha advoulet int bet ewit ober plijadur d’am mignoned o deus goulennet ze diganin, mes dreist-oll ewit gallout lakât etre daouarn ma chenvroïz eur levrig skrivet en yez Treger, herve an doare skrivan divizet a newe zo, ha sikour nep hen lenno da garout muioc’h Doue, da ’n em stagan ouz e vro goant, ha da danva gwelloc’h al levenez a gaver o len pe o kanan sonio ha gwerzio skrivet en hon yez dispar.

Al loden vrasan eus ar c’hanaouenno-man a zo bet ’gret e-pad ma adsaven eus daou var-klenved. Nep n’ an eus ket ankouaet skrido ken koant an Tremener, marvet re abred, siouaz ! a gavo kalz a henveledigez etre hon sonio. Eveltan em eus klasket dalc’hmad frealzi ar c’halono glac’haret, kuzuilhan ar yaouankiz, ha kanan kaerder ma bro Breiz-Izel !

Al-levrig man nê ket gret ewit bean lennet en iliz, daoust ma zo ennan meur a gantik hag a beden, mes en korn an oaled, goude koan, arôk ar pedenno.