1. En hiaul zou é seùel, kan e hra en éned ;
Me huél é kreiz er lann men dousig é tonet. (o)
2. M’hé guel é vrochennat, en ur gan ur soñnen
Tré men dé dré er lann he loñned é tremen.
3. A p’arriù tostik d’ein, me halon e hra joé,
Me lausk ur pozig kan, hi me reskond eùé.
4. — Dématoh, Margeitig, dématoh a galon,
Get un amzér ken kaer, petra laret, mignon ?
5. — Ne houian mé, Loeizig, ne houian nitra vat,
Ne houian meit kañnein, kañnein ha brochennat
6. — Neoah, o buguléz, pen dé er bleu ér gué
Kalon ur verh iouank zeli bleuein eùé,
7. — Me halon, den iouank, e vé perpet eurus,
Pe huélan me mignon, a p’er guélan joéius.
8. — Laret d’ein, Margeitig, più e zou hou mignon ?
En hani e garet zou joé én é galon !
9. Marsé, o Margeitig, hues choéjet un eutru,
Hag hou kroñnou get eur ha dantel a bep tu ?
10. — Petra e hrehen mé é ti un eutru bras,
Pél doh me heh loñned ha doh me fradeu glas.
11. Ne pas, ne pas, Loeizig, un eutru n’em bou ket,
Ar er méz é chomein get men guellan karet.
12. En hani e garan n’é ket pél azohein,
Nen dé ket un eutru, mes ean houi me harein.
13. Pe gañnan ur soñnen m’er hleu é huitellat…
Saill e hra me halon p’er guélan é tostat…
14. Hun boéhieu liés mat ér lanneg didrouzus
Hum géj hag e vrud pél hun haranté padus.
15. Èlté o me mignon, e karehen guélet.
Margeitig ha Loeizig de vikin unañnet ?
16. — A greiz kalon, Margeit, trugèré, trugèré,
Mar don karet genoh hui zou karet eùé…
