18 Jered a vevaz kant daou vloaz ha tri-ugent hag a voe tad da Enok.
19 Jered, goude ma voe bet tad da Enok, a vevaz eiz kant vloaz, hag a voe tad da vibien ha da verc’hed.
20 An holl amzer ma vevaz Jered a voe eta nav c’hant daou vloaz ha tri-ugent, neuze e varvaz.
21 Enok a vevaz pemp bloaz ha tri-ugent hag a voe tad da Vetushela.
22 Enok a gerzaz gant Doue e-pad tri c’hant vloaz goude ma voe bet tad da Vetushela, hag a voe tad da vibien ha da verc’hed.
23 An holl amzer ma vevaz Enok a voe eta tri c’hant pemp bloaz ha tri-ugent.
24 Enok a gerzaz eta gant Doue, ha ne oe gwelet mui rag Doue a gemeraz anezhan.
25 Metushela a vevaz kant seiz vloaz ha pevar-ugent hag a voe tad da Lemek.
26 Metushela, goude ma voe bet tad da Lemek, a vevaz seiz kant daou vloaz ha pevar-ugent, hag a voe tad da vibien ha da verc’hed.
27 An holl amzer ma vevaz Metushela a voe eta nav c’hant nav bloaz ha tri-ugent, neuze e varvaz.
28 Lemek a vevaz kant daou vloaz ha pevar-ugent hag a voe tad da eur mab.
29 Gervel a reaz anezhan Noe, en eur lavarout : Heman hon dic’hlac’haro euz hol labour hag euz ar boan a ro d’hon daouarn an douar en deus milliget an Aotrou.
30 Lemek, goude ma voe bet tad da Noe, a vevaz pemp kant pemzek vloaz ha pevar-ugent, hag a voe tad da vibien ha da verc’hed.
31 An holl amzer ma vevaz Lemek a voe eta seiz kant seitek vloaz ha tri-ugent, neuze e varvaz.
32 Noe a vevaz pemp kant vloaz hag a voe tad da Sem, da Cham ha da Jafed.
6 Pa voe deuet an dud da greskin war-c’horre an douar, ha ma voe ganet merc’hed dezo,
2 mibien Doue, o welout penaos e oa koant merc’hed an dud, a gemeraz gwragez a-douez ar re holl a blije dezo.
3 An Aotrou a lavaraz : Va Spered ne stourmo ket da viken gant an den rag n’eo nemet kig ; e zeiziou a vezo kant ugent vloaz.
4 Ramzed a oa var an douar en amzer-se, hag ivez diwezatoc’h, goude ma voe aet mibien Doue etrezek merc’hed an dud hag o doe roet dezo bugale. Ar re-se eo harozed brudet an amzer goz.
5 An Aotrou a welaz penaos drougiez an den a oa braz var an douar ha penaos kement tra ijinet gant sonjou e galon ne oa nemet fall e pep amzer.
6 An Aotrou en doe keuz da vezan groet an den var an douar, hag e oe glac’haret a gement-se en e galon.
7 An Aotrou a lavaraz : Lemel a rin diwar-c’horre an douar an den am euz krouet, adalek an den betek ar chatal, betek ar stlejviled ha betek laboused an envou, rag keuz am euz da vezan groet anezhei.
8 mes Noe a gavaz trugarez dirak daoulagad an Aotrou.
9 Setu aman lignez Noe : Noe a voe eun den reiz hag eeun en e amzer, Noe a gerzaz gant Doue.
10 Noe a voe tad da dri mab : Sem, Cham ha Jafed.
11 An douar a oa saotret dirak Doue, an douar a oa leun a fallagriez.
12 Doue a sellaz ouz an douar ha setu, e oa saotret, rag pep kig hen doa saotret e hent var an douar.
13 Doue a lavaraz da Noe : Diwez pep kig a zo deuet dirazon, rag an douar a zo leun a fallagriez drezo. Setu, ez an d’o distrujan gant an douar.
14 Gra dit eun arc’h gant koad gofer ; ober a ri lojellou enni, hag e lifri anezi gant peg-du en diabarz hag en diavaez.
15 Setu aman penaos e ri anezi : Hirder an arc’h a vezo tri c’hant ilinad (~ 150 m), he ledander hanter-kant ilinad (~ 25 m), hec’h uhelder tregont ilinad (~ 15 m).
16 Ober a ri eur prenestr d’an arc’h hag ec’h achui anezhan dre eun ilinad (~ 50 cm) ouz krec’h. Lakaat a ri dor an arc’h var he c’hostez. Ober a ri anezi gant eun estaj izel, eun eilvet hag eun trede.
17 Ha me, setu, a ya da zegaz al linvadenn-veur var an douar, evit distrujan kement kig en deus c’hwezaden a vuez dindan an envou. Kement a zo var an douar a varvo.
18 mes diazezan a rin va emglev ganit. Mont a ri en arc’h, te, da vibien, da wreg ha gwragez da vibien ganit.
19 euz kement a vev a-douez pep kig, lakaat a ri da vont en arc’h daou a bep rumm evit o mirout beo ganit : par ha parez e vint.
20 Laboused hervez o rumm, chatal hervez e rumm, holl stlejviled an douar hervez o rumm, daou euz pep rumm a zeuio davedout evit m’o miri beo.
21 Te, kemer ganit euz kement boued a vez debret, gra evel-se eur bourvezans evidout, evit ma servijo kement-se da voued dit kenkoulz ha
