Israel a oe kannet, ha pep hini a dec’haz d’he danten ; al lazerez a oe bras meurbed, ha tregont mil den var droad a Israel a gwezaz. 11 Hag arc’h Doue a oe kemeret ; ha daou vab Heli, Hofni ha Fine, a varvaz.
12 Hag, eun den a Venjamin a dec’haz euz an emgann, hag a eruaz en Silo en deiz se, he zillad roget, ha poultr var he benn ; 13 hag evel ma en em gave, setu, Heli a oa azezet var he gador a goste d’an hent, en gortoz ; rag he galoun a grene abalamour da arc’h Doue. An den ma a ieaz eta en kear da gas ar c’heloiou ze, ha kear holl en em lekeaz da grial. 14 Hag Heli, o klevet ar garmou ze, a lavaraz : Petra eo an drouz ze, hag ar safar ze ? Hag an den ma, en eur hasta, a zeuaz da gaout Heli, hag a ziskleriaz holl dezhan. 15 Hag, Heli a oa oajet a driwac’h vloaz ha pevar-ugent, hag he zaou lagad a oa tevaleet, ha n’he helle ken gwelet. 16 An den a lavaraz eta da Heli : Me eo a zeu euz ar brezel ; hag oun en em dec’het euz ar brezel hirie. Hag Heli a lavaraz : Petra a zo c’hoarvezet, va mab ? 17 Hag an hini a zigase ar c’heloiou a respountaz, hag a lavaraz : Israel hen deuz tec’het dirag ar Filistined ; ha memeuz e zo eul lazerez vras entouez ar bobl, ha da zaou vab, Hofni ha Fine, a zo maro ive, hag arc’h Doue a zo bet kemeret. 18 Hag adaleg ma hen doa komzet euz arc’h Doue, Heli a gwezaz a ziadre divar he gador, en kichen an nor hag e torraz he c’houzouk, hag e varvaz ; rag eun den koz ha pouezuz he oa. Barnet hen doa Israel daou-ugent vloaz.
19 Hag he verc’h-kaer, greg Fine, pehini a oa dougerez ha prest da willioudi, o veza klevet ar c’helou e oa arc’h Doue kemeret, ha ma oa he zad-kaer hag he fried maro, a blegaz hag a c’hanaz ; rag ar poaniou a zeuaz dezhi. 20 Hag evel ma varve, ar re a oa en he c’hichen, a lavaraz dezhi : N’az pez ket a aoun ; rag eur mab ec’h euz ganet. Mes hi na respountaz netra, ha na reaz van ebet a gement se. 21 Hag he c’halvaz ar bugel Ikabod, o lavarout : Ar gloar a zo lamet euz Israel ; abalamour ma oa kemeret arc’h an Aotrou, hag abalamour d’he zad-kaer ha d’he fried. 22 Lavaret a reaz eta : Ar gloar a zo lamet euz Israel ; rag arc’h Doue a zo kemeret.
5 Hag ar Filistined a gemeraz arc’h Doue, hag he c’hasaz euz a Eben-Ezer da Asdod. 2 Goude a Filistined a gemeraz arc’h Doue, hag he digaschont en ti Dagon, hag e lekejont anezhi en kichen Dagon. 3 An deiz varlerc’h, an Asdodied a savaz mintin mad, ha setu, Dagon a oa kwezet, he visach euz an douar, dirag arc’h an Aotrou ; mes int a gemeraz Dagon, hag a lakeaz anezhan en he blas. 4 Sevel a rejont adare an deiz varlerc’h mintin mad, ha setu, Dagon a oa kwezet, he visach euz an douar, dirag arc’h an Aotrou ; penn Dagon hag he zaou dorn, troc’het, a oa var an treujou ; ar c’hef hepken a choume ganthan. 5 Abalamour da gement se sakrifierien Dagon, hag ar re holl pere a ia en he di, na valeont ken var dreujo Dagon, en Asdod, bete birie.
6 Goude dorn an Aotrou a bounereaz var an Asdodied, hag a c’hlac’haraz ho bro, hag ho skoaz a gollou-goad ebarz en Asdod hag en he holl douar. 7 Re Asdod, o welet kement se, a lavaraz : Arc’h Doue Israel na choumo ket en hon zi ; rag he zorn a zo pounereat varnomp ha var Dagon, hon doue. 8 Neuze e kaschont hag e tastumjont holl brinsed ar Filistined, hag e leverjont ; Petra a rafomp-ni euz arc’h Doue Israel ? Hag int a respountaz : Ra vezo kaset arc’h Doue Israel da Gath. Evel se e oe kaset arc’h Doue Israel. 9 Mes goude ma oe bet kaset, dornd an Aotrou a oe var gear hag a reaz eno eun drubul vras, hag e skoaz tud kear, adaleg ar bihana beteg ar brasa, hag e teuaz dezhei kollou-goad. 10 Kas a rejont eta arc’h Doue da Ekron. Hag, evel ma ez ea arc’h Doue en Ekron, an Ekronied a griaz hag a lavaraz : Digaset ho deuz d’hon zi arc’h Doue Israel, evit hon lakaat da vervel, ni hag hon fobl ! 11 Setu perag e kaschont hag e tastumjont holl brinsed ar Filistined, hag e leverjont : Lezit arc’h Doue Israel da vont, ha ma tistroio d’he lec’h, abalamour na varvfomp ket, ni nag hon fobl. Rag eun aoun spontuz a zo dre gear holl, ha dorn Doue a oa pounereet varnezhi. 12 Hag an dud na varvent ket, a vije skoet a gollou-goad ; ha garm kear a binie bete an env.
6 Arc’h an Aotrou o veza bet enpad seiz mis en bro ar Filistined, 2 ar Filistined a c’halvaz ar sakrifierien hag an divinerien, hag a lavaraz dezhei : Petra a rafomp-ni euz arc’h
