eûz war hé benn eur gurunen a vein talvouduz-brâz.
4. Ar vuez en deûz goulennet digan-éz ; ha té éc’h eûz rôet d’ézhan̄ deisiou hîr évid ann amzer, hag évid amzer ann amzeriou.
5. Brâz eo hé c’hloar enn da zieûb ; lakaad a rî war-n-ézhan̄ eur c’hloar hag eur skéd ar brasa.
6. Râk hé lakaad a rî da véza benniget é amzer ann amzeriou ; hé laouénaad a rî gan̄d ar gwél eûz da zremm.
7. Râg ar roué a laka hé c’héd enn Aotrou : ha gan̄t trugarez ar Meûrbéd-uc’hel na vézô két horellet.
8. Ra gavô da zourn da holl énébourien ; ra gavô da zourn déou ar ré holl a gasa ac’hanod.
9. Hô en̄tana a rî ével eur fourn losk enn amzer é péhini é tiskouézi da zremm ; ann Aotrou enn hé vuanégez a reûstlô anézhô, hag hô lakai da véza loun̄ket gan̄d ann tân.
10. Hô frouez a denni diwar ann douar ; hag hô gwenn eûz a greiz ann dûd.
11. Râk digaset hô deûz drougou war-n-od ; mennet hô deûz ioulou, ha n’hô deûz két gellet da zévéni.
12. Dré-zé é likii anezhô da drei hô c’hein ; hag éc’h aozi hô dremm évid ann dilerc’h eûz da zaésiou.
13. Sâv, Aotrou, enn da ners ; nî a ganô hag a veûlô da c’halloud enn hor c’hanaouennou.
1. Va Doué, va Doué, sell ouz-in ; pérâg éc’h eûz-dé va dilézet ? Garmou va féc’héjou a bella ac’hanoun diouc’h va zilvidigez.
2. Va Doué, mé a c’harmô a-zoug ann deiz, ha na zelaoui két ouz-in ; hag a zoug ann nôz, ha na vézô két tamallet da ziboell d’in.
3. Hôgen té a choum el léac’h san̄tel, meûleûdi Israel.
4. Hon tadou hô deûz gédet enn-od : gédet hô deûz, hag éc’h eûz hô dieûbet.
5. Etrézég enn-od hô deûz garmet, hag in̄t bét dieûbet ; enn-od hô deûz lékéat hô gét, ha n’in̄t két bét reûstlet.
6. Évid-oun-mé a zô eur prénv, ha nann eunn dén ; mézégez ann dûd, ha stlabez ar bobl.
7. Ar ré holl am gwélé, a réa goab ac’hanoun ; digeri a réan̄t hô muzellou, hag éc’h hejen̄t hô fenn.
8. Lékéat en deûz hé c’héd enn Aotrou, émé-z-hô, ra ziéréô anézhan̄ ; ra zieûbô anézhan̄, mar kâr anezhan̄.
9. Râk té eo éc’h eûz va zennet eûz a gôv vâ mamm ; va géd oud bét pa édoun c’hoaz oud ar vronn.
10. Etrézég enn-od ounn en em daolet kerken̄t ha ma ounn deûet er-méaz eûz hé dargreiz ; va Doué oud aba ma ounn deûet eûz a gôv va mamm.
11. N’en em denn két diouz-in, râg ar c’hlac’har a zô tôst ; râk n’eûz hini a gémen̄t am skoazelfé.
12. Kalz a éjenned iaouan̄k hô deûz va strôbet ; tirvi lard hô deûz va grounnet.
13. Digoret hô deûz hô génou war-n-oun, ével eul léon skrapuz ha iuduz.
14. Ével dour ounn bét dinaouet, ha va holl eskern a zô bét diléc’het. Va c’haloun em c’hreiz a zô deûet ével koar zô ô teûzi.
15. Dizec’het eo va ners ével eur pôd-prî, ha va zéôd a zô en em staget out va staon̄ ; ha va c’haset éc’h eûz bété poultr ar béz.
16. Râk kalz a châs hô deûz va strôbet ; eur strollad a dûd droug en deûz va grounnet. Toullet hô deûz va daouarn ha va zreid.
17. Va holl eskern hô deûz nivéret. Hag hi a zellé ouz-in hag a arvesté ac’hanoun.
18. Rannet hô deûz va diḻad étré-z-hô, hag hô deûz taolet va zaé d’ar sort.
19. Hôgen té, Aotrou, na bella két da skoazel diouz-in ; laka da boan évit va diwallout.
20. Dieûb va éné eûz ar c’hlézé, ô Aotrou ; tenn-hén̄, pa n’em eûz német-han̄, eûz a baô ar c’hi.
