9. Dieûb da bobl, Aotrou, ha bennig da zigwéz ; ha rén anézhô, ha sav anézhô da-vikenn.
1. Digasit d’ann Aotrou, bugalé Doué, digasit d’ann Aotrou ar menned-tourz.
2. Digasit d’ann Aotrou ar c’hloar hag ann énor, digasit d’ann Aotrou gloar hé hanô ; azeûlit ann Aotrou enn hé borc’hed san̄tel.
3. Mouéz ann Aotrou a zô war ann douréier ; ann Doué a veûrdez en deûz ruḻet hé gurun ; ann Aotrou a zô war ann douréier brâz.
4. Mouéz ann Aotrou a zô enn ners ; mouéz ann Aotrou a zô er meûrded.
5. Mouéz ann Aotrou a dorr ar gwéz-sedr ; ann Aotrou a dorrô gwéz-sedr al Liban.
6. Hô bruzuna a rai ével eul leûé eûz al Liban ; hag ével menn eunn unikorn karet gan̄d hé vamm.
7. Mouéz ann Aotrou a skiñ flamm ann tân.
8. Mouéz ann Aotrou a laka da gréna ann distrô : ann Aotrou a lakai da gréna distrô Kadez.
9. Mouéz ann Aotrou a aoz ar c’hirvi, hag a ziskouézô al lec’hiou stan̄k ; hag ann holl enn hé dempl a embannô hé c’hoar.
10. Ann Aotrou eo a laka ann dic’hlann da choum ; hag ann Aotrou a azézô da roué da-vikenn.
11. Ann Aotrou a rôiô ners d’hé bobl ; ann Aotrou a vennigô hé bobl er péoc’h.
1. Da zével a rinn, Aotrou, ô véza ma éc’h eûz va zavet ha n’éch eûz két lékéat va énébourien d’en em laouénaat diwar va fenn.
2. Aotrou va Doué, étrézég enn-od em eûz garmet, hag éc’h eûz va iac’héet.
3. Tennet éc’h eûz, Aotrou, va éné eûz ann ifern : va dieûbet éc’h eûz eûz a zouez ar ré a ziskenn er poull.
4. Meûlit ann Aotrou enn hô kanaouennou, c’houi hé zen̄t : hag an̄savit ar c’houn eûz hé zan̄télez.
5. Râg ar vuanégez a zeû eûz hé frouden, hag ar vuez eûz hé ioul ; ann daérou a zeû diouc’h ar pardaez, hag al lévénez diouc’h ar min̄tin.
6. Hôgen mé em eûz lavaret em founder : Bikenn na vézinn horellet.
7. Dré da ioul, Aotrou, ez pôa rôet ners d’am eûr-vâd : da zaoulagad éc’h eûz distrôet diouz-in, hag ounn bét reûstlet.
8. Étrézég enn-od é c’harminn, Aotrou : hag é pédinn va Doué.
9. Da bétrâ é talvô va goâd, pa ziskenninn er béz ? Hag ar poultr az meûlô, pé a embannô da wirionez ?
10. Ann Aotrou en deûz va c’hlévet, hag en deûz bét truez ouz-in : ann Aotrou a zô deûet d’am diwallout.
11. Trôet éc’h eûz va c’heinvan é dudi ; roget eo bét va zac’h gan-éz, hag éc’h eûz va grounnet a lévénez,
12. Évit ma kaninn d’id em c’hloar, ha né vézinn mui glac’haret. Aotrou va Doué, da veûli a rinn da-vikenn.
1. Enn-od, Aotrou, em eûz lékéat va géd, na zispenn két ac’hanoun da-vikenn : dieûb ac’hanoun enn da reizded.
2. Dinaou da skouarn étrézég enn-oun, hast va zenna ac’hann. Béz d’in da Zoué difenner, ha da dî a vénéc’hi, évit ma tieûbi ac’hanoun.
3. Râk té eo va ners ha va ménéc’hi ; hag enn abek d’as hanô é réni ac’hanoun, hag e vagi ac’hanoun.
