1. Tenn ac’hanoun a boan, ô Doué, enn da hanô ; ha barn ac’hanoun enn da ners.
2. Sélaou, ô Doué, out va féden ; rô skouarn da c’heriou va génou.
3. Râk diavésidi a zô savet em énep, ha lôd kré hô deûz klasket va buez : ha n’hô deûz két lékéat Doué dira-z-hô.
4. Chétu Doué a skoazel ac’hanoun ; hag ann Aotrou a zô da zifenner d’am buez.
5. Distol ann droug war va énébourien ; ha kâs-hi da-gét enn da wirionez.
6. A-galoun-vâd é kenniginn d’id eur sakrifiz, hag é veûlinn da hanô, ô Aotrou ; râk mâd eo.
7. Râg eûz a béb en̄krez éc’h eûz va dieûbet ; ha va lagad en deûz sellet gan̄d herder out va énébourien.
1. Sélaou, ô Doué, out va féden, ha na zispriz két va goulenn vuel.
2. Sell ouz-in, ha sélaou ouz-in. Glac’haret ounn bét enn eur brédéria war va foaniou (T) ; reustlet ounn,
3. Gan̄t mouéz ann énébour, ha gan̄d en̄krez ar péc’her. O véza ma hô deûz taolet fallagriézou war-n-oun ; ha ma hô deûz va heskinet enn hô buanégez.
4. Va c’haloun a zô reûstlet enn-oun ; ha spoun̄t ar marô a zô kouézet war-n-oun.
5. Ann aoun hag ar c’hrén a zô kroget enn-oun ; hag ann dévalien é deûz va gôlôet :
6. Hag em eûz lavaret : Piou a rôiô d’in diou-askel ével ar goulm, hag é nijinn, hag é arzaôinn ?
7. Chétu em eûz tec’het pell ; hag ounn choumet enn distrô.
8. Mé a c’hortozé ann hini en deûz va dieûbet eûz a fillidigez va spéred, hag eûz ann arné.
9. Diskar-hi, Aotrou, rann hô zéôdou ; râg gwélet em eûz ar fallagriez hag ann énébiez é kéar.
10. Ar fallagriez a strôbô anézhi nôz-deiz war hé muriou ; hag al labour a zô enn hé c’hreiz,
11. Hag ivé ann direiz. Hag ar c’hampi hag ann touellérez a zô bépréd war hé leûriou kéar.
12. Rak ma venn bét milliget gan̄d eunn énébour d’in, em bijé ken̄toc’h hé c’houzan̄vet. Ha ma ve bét gwall gomzet ouz-in gan̄d eunn dén hag en divijé va c’haséet, martézé é vijenn en em guzet ra-z-han̄.
13. Hôgen té a zô eunn dén a oa a-unan gan-én̄, a oa da benn d’am c’huzul ha va miñoun brâz :
14. Té péhini a zebré bôedou c’houék kévret gan-én̄ ; té gan̄t péhini é valéenn gan̄t unvaniez vrâz étrézé tî Doué.
15. Ra zeûi ar marô war-n-hô ; ha ra ziskennin̄t d’ann ivern béô buézek, ô véza ma éma ann drougiez enn hô ziez, hag enn hô zouez.
16. Hôgen mé em eûz garmet étrézé Doué : hag ann Aotrou a zieûbô ac’hanoun.
17. Diouc’h ar pardaez, diouc’h ar min̄tin, ha da grésteiz é tanévellinn hag é embanninn ; hag hén̄ a zélaouô out va mouéz.
18. Daspréna a rai va éné é péoc’h digan̄d ar ré a dôsta ouz-in : râk kalz anézhô a oa gan-én̄.
19. Doué a zélaouô ouz-in, hag a vuélai anézhô, hén̄ péhini a zô abarz ar c’han̄tvéjou. Râk n’eûz kemm é-béd enn-hô, ô véza na zoujon̄t két Doué.
20. Astennet en deûz hé zourn évid disteûrel d’ézhô ar péz a zellezon̄t. Saotret hô deûz hé gévrédigez.
21. Skiñet in̄t bét gan̄t buanégez hé zremm ; hag hé galoun a zô tôstéet. Hé lavariou a zô chouékoc’h égéd éôl ; hôgen é doaré darédou in̄t.
