Oh ! al lizerio koz
Dastumet en arc’h kloz !
E.M.L.
Eur zul goude ar gouspero,
Dilabour krenn ha skwiz-maro,
Deuz ma c’hambr serret ouz ar goanv,
E sellen ar glao o kouean.
Ma spered ’oa meurbed ponner,
Ha na ouien petra ober,
Pa deuaz, en eun tôl, ’n em fenn,
’N em lakât eur pennad da lenn.
Me da gemer lizerio koz
Dastumet en eur arc’hik kloz,
Ha da lenn anê gant aket
Evel pa ’m oa o reseved.
Meur a devez deuz ma bue
Dirac’h-on ’dremenaz neuze :
Deio a joa, deio a boan,
Deio a glemm, deio a gan.
Nag e oa laouen d’am c’halon
Hadlenn lizerio eur mignon,
Eur breur, eur c’hoar, eun tad, eur vamm !
…Siouaz ! Et ec’h int holl en flamm !
Ho laket ’m euz e-barz an tan ;
Devet int bet holl a-unan ;
Ha gant ar moged diout-e
’Zo et dek vla deuz ma bue.
Na pebez torfedour on bet !
Ma c'halon baour am euz mantret.
Piou ’ta ’n euz dallet ac’hanon,
Penn-botez, genaouek ma ’z on !…
Unan deuz al lizerio-ze,
Karanteüs ha leun a fe,
A oa skrivet d’in gant ma zad,
Hag a lare ’vel-hen, ken mad :
« En Nenv eman da dad kentan ;
Nemed derc’hel e blas ne ran,
Ha kent evid zentin ouz-in
’C’h ê gleet d’id out-An zenti… »
Eul lizer-all, skiantek braz,
— Ma gwella mignon hen skrivaz
Pell deuz hon Breiz o veaji —
’Lere ’vel-hen gant melkoni :
« Aboue pewar pe bemp pla ’zo
Em euz baleet meur a vro :
Biskoaz hini n’am euz gwelet
Ken brao ’vel Bro ar Vretoned.
« Biskoaz, m’hel lar a voez huel,
Da Zoue, d’e Iliz zantel,
Na zo bet hini ken feal,
Na ken doujet gant an dud fall.
« Dizec’han ’rin, heb dale pell,
Mar nan an prim da Vreiz-Izel :
Ar gwenneli zistro d’e neiz ;
Me a renko distrei da Vreiz… »
’N eur lizer-all a lennen c’hoaz :
« Me a vo beleget arc’hoaz ;
Evid ma vo prest ma c’halon,
Eur bedennik vad evid-on… »
Doue, ma c’herent hag ar Vro
’Dremenê dre ma lizero…
Ha sethu ’m euz o luduet !
Nag evid-on pebez torfed !
’Meint c’hoaz dirag ma daoulagad,
Gant ar flamm o troïdellad.
Tad ha mamm, breur ha c’hoar, mignon,
Me a c’houll digan-ec’h pardon !
An Tremener.
E miz Meurs 1899.
