Adlennet eo bet ar bajenn-mañ
— Ia, ar vrò-ze eo Breiz-Izell,
Kùdon a nij a denn-askel
War zu ma brò, lavar, koulmik,
Deiz-mad da Vòna, ma dousik. —
— Làr d’in, anaout a rez ar vrò,
A gar he giziou kòz atò,
Ma peder c’hoaz enn ilizou,
Hag er véred, war ar beziou ? —
— Ia, ar vrò-ze eo Breiz-Izell.
Kouabren, kasset gant ann awel,
Eùn tamm d’ann douar diskennet,
Ha bete ma brò ma douget. —
— Lâr d’in anaout a rez ar vrò,
Ma kàner gwerziou ha zònio,
E tàl ar fornigal, bep-nòz,
E koùn oberiou ar re gòz ? —
