Ann Derrien koz a lavare
D’he verc’h Jannet, un dez a oe :
— Ma merc’h Jannet, mar am c’haret,
D’al leur-newe na efet ket.
— Bet drouk gant ann nep a garo,
D’al leur-newe me a ielo ;
Mar be sonerrienn, me danso.
Gant ma dous koant Iouenn Gwillou.
Jannet Derrien a lavare
D’ Iouenn Gwillou, el leur-newe :
— Mar am difennet mad fete,
Me hoc’h eureujo goude-ze.
Ann aotro ar Recho ’lâre,
El leur-newe pa arrue :
— Demad holl el leur-newe-ma,
Jannet Derrien pelec’h ema ?
— Eman duze ’n korn ann dansou,
Gant he dous koant Ervoan Gwillou.
’Nn aotro ’r Recho ’vel ma klewas
’Tal ann danso a em rentas.
Ann aotro ’r Recho a lâre
D’Ervoan Gwillou eno neuze :
— Em denn al lec’h-se, preponier,
Honnes n’eo ket euz da affer.
— ’Wit kement am eûs friponet,
Ho plajo n’am eûs ket lipet ;
M’am bije un tammig krennenn,
M’ho kasje kuit brema soudenn !
. . . . . . . . . . . . . . . . . . . .
Kriz ’vije ’r galon na oelje,
El leur-newe nep a vije,
O welet al leur o ruia
Gant goad ’nn dud-jentil o skuilla ;
