Pajenn:Perrot - Bue ar Zent.djvu/442

Adlennet eo bet ar bajenn-mañ
442
16 Mezeven
sant yan-fransez regis


C’houezekvet devez a Vezeven


Sant Yan-Fransez Regis
Eus a Gompagnunez Jezuz (1597-1640)



Yan-Fransez Regis a zo unan eus ar brudetan sent he deus roët Kompagnunez Jezuz d’an Iliz.

Genel a reas en Foncouverte, en eskopti Narbon, d’an 3l a viz genver 1597 ; diskenn a rê eus unan eus gwellan ha brasan tiegeziou al Langedok.

Adalek e vlaveziou teneran, e weled anat ennan ar merkou eus e zantelez da zont. Glan oa a galon ha troet war ar beden. Da naontek vla, e oe digemeret en Kompagnunez Jezuz, hag e skedas enni dre e humilite, e zentidigez, e garante evit Doue hag an nesan hag e zisprizans evitan e-unan.

Er bla 1630, e oe beleget. Dal ma oe peurc’hrêt e studiou gantan, eo em roas holl da labourat evit silvidigez an ineou.

Meneiou garo ar Vivarê, ar Velê hag ar Forez a welas anezan ; redek a rê dreze, dre ar skorn hag an erc’h, an drez hag ar spern, da glask tud hanter-oue ar broiou-ze ; lakat a reas eun niver bras eus an dud-ze, touellet gant geier ar galvinisted, pe gollet gant o zechou fall, da anzao ar gwir fe ha da heuilh ar vue gristen.

Er goanv e prezege war ar mêziou hag en hanv er c’hêriou. Gwellât a reas kalz stad ar vro, en Montpellier hag er Puy. Mont a rê da glask ar bec’herien d’an hospitaliou, d’ar prizoniou, d’o zier.

Divent oa e vadelez en kenver ar beorien. E-unan ec’h ee d’ober an dro evite ; arc’hant, ed, dilhad, gweleou, linseliou, a oa holl treo hag a oa diouz e zoare. 0 zerri a rê en eur gambr a deuas da vezan tensor ar beorien ; estrevit eur wech e lakas an ed enni da greski dre virakl. Lezhanvet oe Tad ar beorien.

Poanial reas ive da dennan diwar hent an dizenor ar merc’hed kez a gerze warnezan. A-benn diou wech, e risklas e vue evit mont war-dro an dud klanv gant ar vosen.

Seul-vui oa mat en kenver e nesan, seul-vui oa kalet en e genver e-unan. Kastizan rê e gorf gant ar gourizou reun, ar chadennou houarn, ar skourjezou yud ; evit