Nemed, e-skeud ar c’hleuz, eur roudenn a zisheol,
Heoliet kaer-meurbed oa, mintin mad, ann hent holl ;
Ann dud, a strolladou, re vraz ha bugale,
Dibreder, hed ann hent, vel ann heol a ioa gae ;
Eur zulvez oa, m’ar plij ! deiz eur pardoun oc’hpenn ;
Ar merc’hed, gwisket kaer, a zivize laouen,
Ar goazed, ken kaer all, puret gwenn ho boutou,
A glevet o farsal hag o kana souniou,
Hag a bep tu d’ann hent al laboused ivez,
Evel vid heul ho c’han, a zavo skiltr ho mouez.
Klevet a reat oc’hpenn ar chas stag, oc’h harzal,
Ann anevaled korn, enn draonienn, o vlejal,
Hirvoud ann avelik e lein ar meneziou
Ha klemmadenn ann dour a-dreuz mein ar goueriou.
Kanaouenn, hirvoud, trouz, a-dost koulz hag a-bell,
Enn ear a zave skanv war askel ann avel.
Kement a levenez, a reaz, evel gwech’all,
D’am c’haloun enkrezet, enn eur mare tridal.
Evel da c’houezek vloaz, setu me da gana
Ha da farsal kement eged ar rt c’haea ;
Ne zonjenn ket en doa dourn ann amzer, siouaz !
War va zal roufennek skrivet ann oad, doun-braz.
Enn eur zellet ouz-in, ar re iaouank, m’oar vad,
A deue da vous-c’hoarzin ha da va goapaat,
O lavaret izel : « Sellit, ar c’heazik koz
Ne zonj ket eo ken tost, euz he vuez berr, ann noz ! »
Petra ra-ze, p’eo gwir em oa c’hoaz, eunn dervez,
