Hanwet oun ar c’hlasker bara,
N’hen eus ti na gwélé, nétra,
Renko bepred, keit ma vô beo,
Mont ha bâlé, vel Boudedeo.
Bars ma dorn ma fenn-bâz dero,
’Vâlean, heb paouès, ar vro,
War ma skoaz eur bis-sac’h lienn,
Lec’h na vé kammed bara gwenn.
N’han ket liés d’ar c’hèriou braz,
Ar chass, ’vel ma welont ma bâz,
Hag en pillaou ma holl dillad,
A réed war-n-oun, ’vel war eur c’hâd.
Ann dud iwé ’zo didruez,
Holl lâront d’in : — « Koz didalvez ! »
Ha goapâd ’ra meur a hini…
Ah ! goapâd ar paour ’n hi gozni ! —
War ar meaz é-ma ann dud vad :
Eno am bé ma skudellad,
Ha zoken eûn tammik kik-sall,
Eur banné gistr, ’vel ar ré-all. —
Pa digwez-han, war dro ann noz,
Lar-han : « Lojet vô ar paour koz ? » —
Hag ann ozac’h kerkent neuzé :
— « Deuit a-raog, azeit azé. —
Pell braz n’hon boa ket ho kwelet,
» Pé-lec’h a-baoué ’oc’h-c’hui bêt ?
» Ièn è ’n amzer, deût da dòma :
» Gaodik grèt-c’hui soup d’ann den-ma ! »
Neuzé c’houlenn newentizou
Ar c’hanton hag ar parouziou ;
Ha kent ewit mont da gousket,
Eur werz-koz bennag ’ve kânet.
En kraou ar zaoud pé ann oc’henn,
War ar plouz, ’tiskuis-han ma fenn,
Goudè bout grèt ma fédéno,
Hag é kouskan mad-kaer éno.
Jezuz, hon zalwer benniget,
En eur c’hraou oc’henn ’zo gânet :
Lec’h eur paour, pa vên eur Roué,
Penaos c’hoantaout gwell ’wit Doué !
N’ c’hoantaan ket oc’h énoriou,
Tud pinvidig, nag ho mâdou ;
Ma Doué, leûn a vadèlez,
Ma gwel iwé gant karantez.
Ewit-oun, ével ’wit ann holl
E lugern hag é tôm ann heol,
Hag ann eined, skanv ha lirzin,
A gân uz d’am fenn, er mintin.
Ma tîgwez d’in kousket é-méaz,
(Evel éma chans ar paour kéaz.)
A uz d’am fenn ’vé ar stéred,
Hag am diouall a zroug bepred.
A-wechou é sonj d’in gwelet
Ann oabl ewit-oun dîgoret,
Ha, di-war eur goumoulenn aour,
Jezuz-Krist o laret d’ar paour :
— « Paour kéaz, achu eo da boaniou,
» Deuss ganîn brema d’ann envou,
» En touez ar zennt, ar zennetezed,
» Ar prophéted, ar merzered.
» Gwisket d’id eur zaè lienn gwenn,
» Ha war da dâl eur stérédenn,
» E kâni ma méleudiou
» Béleg divez an amzeriou ! »
- F.-M. Ann Huel.
- Plouaret, ann dri a vîz gwengolo. (1865)