TRISTE ER BARH
————
- De Vlei-Lanvaus.
« Hur hroueet e hues eid oh, o
Doue, hag ankinet e vo hur c’halon
beteg ma tiskuehou enoh. »
Iaouank on : N’em es chet hoah ugent han ;
En hiaul tro ha tro d’ein e skuill e sklerder tan,
Er bleu ar en aùel e gas d’ein ou front vat,
Ha neoah me zou lan a velkoni dalc’hmat.
Perak ’ta ? — Doue e houer : Pe groueas er Breton,
Ean lakaz en driste e donded e galon.
Arriùet on en oed e vourer e biùein,
E ridek d’er parkeu, e hoari, e kanein,
En oed ne chonjer ket en amzer hag e bas,
Indan me zreid er bleu e zigor de bep pas :
E kreiz er blijadur, neoah, ankinet on :
Doue lakas en driste e kalon er Breton !
En holl dud tro ha tro e hoarh d’en neue-han ;
En estig ar er bar e lar e son vraùan,
Rah en ened e streù ou fazieu guiù en er ;
Ha me, pe gemeran me zelenik dister,
Hirvoudein ’hra berped : ne houeran meid un ton :
à Doue lakas en driste e kalon er Breton !
Peb tra e zeliche gober d’ein leùine :
Iaouankiz ha frankiz, bleu er prad, hiaul en ne,
Petra muioc’h ’zou ret, d’ober un den euruz ?…
Ha neoah, er bed-men ne gavan ket bourus
Un dra bennak ataù e vanka d’ein ennon :
Doue ’lakas en driste er kalon er Breton !…
O men Doue ! En dra-se e hoantan-me bremen,
Hui e !… Rak ar en doar ne hramb nemeit tremen,
Rak n’e ket aveiti ’ma groeit hur haloneu !
Mez pe huelemp o tont karig gwen en Ankeu
Eit hun dougein du-ze, gennoh ; barh en nean don…
Neze ’vou leuine e kalon er Breton !
|
————
