Er hombat spirituel/Chapistre 01

◄   É petra e consiste er berfection a grechéneah ; eit en devout hi, ret é combattal, hac eveit douguein er victoér ér hombat-zé, puar tra zou necessær. Ag en difiance a hanomp hun hunan.   ►


ER HOMBAT
SPIRITUEL.
————
Hanni ne vou couronnet, ma n’en d’eus combattet erhat. 2 Tim 2
————
CHAPISTRE I.

É petra e consiste er berfection a grechéneah ; eit en devout hi, ret é combattal, hac eveit douguein er victoér ér hombat-zé, puar tra zou necessær.


Mar fal deoh, ô inean crechén, arriue bet-ac er blein ag er berfection a bebani é conze en aviel, hac hum joentein doh Doué en ur fæçon ma tehet de vout ur memb isprit guetou, ret é, eveit donnet de bèn én un dra pehani e zou er vrassan hac en noplan e eller chongeal, ma ouïehet de guetan petra é er veritable ha parfæt santeleah.

Bout e zou ré én ur gonsiderein er vuhé spirituel a zianvès hemp quin, e ra dehi consistein ér penigenneu a gorf, èl é touguein ur cilice, é quemer en disciplin, é yeunein hac é hober mortificationeu aral.

Hilleih, ha drès er real er merhet, e chonge bout vertuus-bras, a p’ou dés quemeret en accustumance de laret pedenneu hir, de glèuet hilleih a overenneu, d’assistein én office divin pèn-d’er-ben, de chom pêl amzer én ilis, ha de gommunien liès.

Bout zou memb émesq er ré e chervige Doué er stad a gloéregueah, ré e gred é ma assès, aveit bout parfæt, bout fidel d’er hœr, cârein er retraite hac er silance..., hac èl-cé lod e laqua er berfection é unan ag en exerciceu-zé, lod aral én un aral ; mæs certæn é penaus en um drompant ol, rac en œvreu a zianvès él nen dint meit dispositioneu eit donnet de vout parfætemant santel, pé fréh ag er santeleah parfæt, n’eller quet laret éma én œvreu-zé é consiste er berfection a grecheneah hac er gùir santeleah.

Moyanteu puissant int aveit donnet de vout é gùirioné spirituel ha parfæt ; hac a pe rer usage a nehai guet avis, chervige mat e rant de vortifiein en natur perpet lache aveit er mat, ha perpet a volanté vat eit en drouc ; de bellat en tantationeu ha de zihoal doh laceu hun anemis quemun, ha d’en dout anfin guet en tad a visericorde er secourieu peré e zou necessær d’en ol tud juste, principalemant d’er ré e gommance.

Freh excellant int ehué ag ur vertu bras en dut parfætemant santel ha spirituel, rac int e hoal-dræte ou horf, pé aveit er punissein a é zirangemanteu passet, pé aveit en humiliein hac el laquat de bléguein d’é Grouéour. Cârein e rant er silance hac er vuhé dissorb, pêl doh er foul, aveit hum hoarantein doh en distéran fauteu hac hum antretenein hemp guin én Ean guét en Ælé. Hum laquat e rant d’ober œvreu mat ha de chervigein Doué ; pedein e rant ; meditein e rant ar vuhé ha passion hur Salver, non pas dré un isprit a guriosité, na rac ma cavant én dra-zé ur blijadur sansibl benac ; mæs dré en desir d’hanàuein gùel ag un tu, misericorde en eutreu Doué, hac ag en tu aral, ou ingratitude ; d’um zouguein muioh mui de gârein Doué, ha d’en hum gasaat int-memb ; de heliein hur Salver, en ur zouguein é groéz, en ur renonciein d’ou volanté prope, en ur dostat d’er sacremanteu, hemp intantion er bet quin meit d’inourein Doué, d’hum joentein stertoh doh-t’hou, d’hum fortifiein davantage einep d’er puissanceu ag en ihuern.

Er hontrel e arriue guet tud ponér hac imparfæt peré e laqua ou devotion én œvreu a zianvæs ; rac liès caus int dehai de hum gol, hac hilleih mui a zomage e rant dehai eveit pehedeu memb : nen dé quet nen dint mat a nehai ou hunan, mæs rac ma rant goal-usage a nehai. Int e zalh ar nehai en ur fæçon ma ancoéhant er sourci a ou interior, int e lausq ou halon libr de heli hé inclination, hac én danger de goueh é laceu er goal-speret. Ha nezé en esprit trompus-zé é uélet é tivarchant diar en hent mat, n’ou solite quet hemp quin de gontinuein guet plijadur ou exercice ordinær, mæs ean e zegas dehai hilleih a chongeu væn ar blijadurieu er Baraouis é pehani e chongeant bout dejà émesq en Ælet ha jouissein a bresance en eutru Doué. Ean en dès memb er malice, a pe rant én oræson, de laquad en hou fèn chongeu forh-ihuel, ré curius hac agréabl, eit, a p’ou devou én ur fæçon benac, ancoéheit er bed hac en treu ag en doar, ma havalou guetai bout sàuet bet lein en Ean.

Mæs a pe seller bihan dra doh er fæçon ma hum gomportant, é uéler penaus é fariant ha péh quer pêl int doh er berfection ihuel-zé e glasquamb ; rac é quement tra zou ol, bras ha bihan, n’ou dès quin desir meit de vout istimetoh aveit er real ; ne heliant meit ou chonge ; ne rant meit ou volantè ; ha dal a fæd ol er péh ou sèl, ou deulegat e zou perpét digueor eit spiein ha controlein actioneu er real. Mar toucher quer bihan èl ma cârehet doh er reputation væn-zé e chongeant ou devout abarh er bed, hac a behani émant forh-jalous ; mar bé ordrenet dehai lezel certein pratiqueu a zevotion doh peré émant accustumet, hum droublein hac hum nehancein e rant estrange. Doué ean-memb aveit ou desquein d’en hum hanàuein, ha discoéin dehai er gùir hent a berfection, mar degas dehai trebilleu, clinhuedeu, persecutioneu cruel, peré e zou en approqueu er ré surran a fidelité é serviterion, ha peré n’arriuant jamæs hemp é ordre pé é bermission, gùélein e rer nezé ou interior couciet bet en don dré en orgùeil a behani éma carguet.

Ne vern petra arriue durant er vuhé-man, mat pe droug, ne ouïant a nehai petra-é hum ober doh volanté Doué, hum humiliein édan é zourn ol buissant, pléguein d’é jugemanteu peré zou quer juste el m’emant segret ha drest isprit mab dein ; pétra-é hum zeval izéloh aveit en ol, revé exampl Jesus-Chrouist ; petra-é cârein ou anemiset a beré un Doué quer mat e hum chervige non pas hemp quin eit ou salvedigueah, mæs hoah eit ou ferfection ér vuhé-man. Er peh zou caus dehai bout perpet ér brassan danger de hum gol ; rac er garanté disordre ou dès doh-t’hai ou hunan ha doh ou actioneu a zianvæs, peré dré ou natur e zou forh vat, e ra dehai hum hlorifiein a nehai, hum sellet avancet mat én hent a berfection, condanein ou nessan ; ha forh liès en orgùeil ou dall quement m’ema ret cavouét ur græce extraordinær a ziarlué eit ou honvertissein.

Ehué en expériance a zisque demp n’en dé quet quen diæz convertissein ur pehour disclériet, èl ur pehour en um ziguis hac en um guh exprès doh-t’hou é hunan édan en apparance ag er vetru. Hui e gompren erhat breman penaus er vuhé spirituel ne gonsiste quet én ol treu-zé a beré hun nés conzet, ma ne vant consideret meit a zianvæs : consistein e ra hemp quin é hanànein madeleah ha brastæt infini en eutru Doué, hac é santein ar un dro hun izeldæt-ni hac hun inclination eit en droug ; é cârein Doué ha doh hum gassat ni-memb ; é soublein non pas hemp quin édan-d’hou, mæs édan en ol a balamor dehou ; é renonciein agrén d’hun volanté prope, eit heliein é hani, ha drès peb tra é hober en treu-zé eit er gloer hemp quin a é hanhue beniguet, hemp intantion er bet quin meit de bligein dehou, dré er ræson hemp quin ma venn ha ma verite bout câret ha cherviget guet en ol.

En dra-zé é e lar el lézen ag er garanté e zou bet laqueit é calon er ré juste dré er Speret-santel ; ér fæçon-zé é pratiquer er renonci hont a hanamp hun hunan recommandet quement dré hun Salver én aviel : en dra-zé é e rant é yahue quen agreabl hac er béh e ra de zouguein quer scan ; én dra-zé é consiste en aboeissance parfæt en dés anseignet perpet demp er mæstre divin-zé ha dré é gonzeu ha dré é exampl. Pe fal deoh enta arriue bet-ac er blein ag er berfection, ret é gober ur brésel continuel deoh hou hunan, ha laquat poén de zistrugein hou coal inclinationeu er ré distéran memb. El-cé ret é absolumant um breparein de zihuen ha bout resolus ha courajus ér hombat : rac hanni ne vou couronnet, meit goudé en devout combattet guet courage.

Mæs chonget penaus èl n’en dès brésel er bet rustoh aveit hena, p’en de gùir en ur gombatal einep d’omb hun hunan, é ma ni hun hunan é en anemis e zihuen doh-omp : (de laret é er fragilité a hun imur, er fallanté a hun halon, hur fal accustumanceu, hur goal inclinationeu) nen dès victoér er bet ehué agréaploh de Zoué, na gloriussoh d’en hani en dès douguet er victoér ; rac piue-benac en dès er gourage de vortifiein é hoal-inclinationeu, d’ou feahein, de zrastein bet-ac en distéran boulge a é volanté ; hennéh e ra un œuvre agréaploh dirac Doué étal pe zispennehai é gorf guet tauleu dichiplin, étal pe yeunehai rustoh eveit en hermitet ancien, étal pe gonvertissehai memb un nombre bras a beherion.

Hac én effet, a pe voa sellet erhat en treu én hæ ou hunan, deusto ma ra en eutru Doué hilleih mui a stad a gonversion un inean eveit a vortification un desir disordre benac, peb-unan neoah e zeli laquat é ol boén ha sourci é hober er péh e oulen Doué guetou é particulier. Hama er péh e oulen Doué drès pep tra é, ma vou labouret a zevri de laquat er goal-imurieu de bléguein ; hac en dra-zé e blige davantage dehou, eveit pe vehai rantet dehou ur chervige benac hilleih consideraploh, guet ur galon pehani ne vehai quet agrên dehou.

Breman enta ma ouïet petra é er berfection a grechéneah, ha penaus aveit arriue bet-hi, é ma ret teoh quemer er resolution d’ober ur brésel continuel énep deoh hui-memb, hum bourvayet quênt commance a buar tra, èl a armeu hemp peré é ma impossibl deoh gouni ér hombat spirituel-zé. Er puar tra-zé e zou en difiance a hanoh hui-memb, er gonfiance é Doué, en usage vat a buissanceu hou corf hac a ré hou inean, hac er bedèn. Ni e gonzou a nehai, guet secour Doué, én ur fæçon splan ha berr ér chapistreu e yan de scrihue.