Katekiz historik/Eil Gévren - I Gentel

Abad Claude Fleury

Katékîz historik é péhini é kaveur é berr gomsiou ann Histor santel hag ar gélénadurez gristen

troet gant Yann-Frañsez ar Gonideg.
F. Trémeau, 1826  (p. 57-59)

---

---

EIL GÉVREN,

PÉHINI A ZALC’H É BERR GOMSIOU

AR GÉLÉNADUREZ GRISTEN.

---

KENTA GENTEL.

Eûz ar Feiz, eûz ann Espérans hag eûz ar Garantez.

El lézen Gristen éz eûz péder gévren : Sembol ann Ébestel, Péden ann Aotrou, Gourc’hémennou Doué hag ar Zakramanchou. Er Sembol é kaveur ar péz a dléomp da gridi dré ar feiz ; er Béden, ar péz a dléomp da c’houlenni gant espérans ; Gourc’hémennou Doué a ziskouéz d’é-omp ar péz a dléomp da ôber dré ar garantez, da lavaroud eo, dré garantez Doué ha dré hé c’hrâs, a zigéméromp dré ar Zakramanchou. Dré-zé holl lézen Doué a zô pâr d’ann teir vertuz-man, ar Feiz, ann Espérans, hag ar Garantez. Na hellomp kéd hô c’haout ac’hanomb hon-unan ; réd eo é teûfé Doué d’hô rei d’é-omp dré hé vadélez. Dré ar Feiz é krédomp stard kémend en deûz Doué diskieriet d’hé Iliz, da lavaroud eo, da strollad ann dud léal, péhini a bâd adalek penn-kenta ar béd bété nî : kémend hô deûz kélennet ann Tadou-brâz, ar Broféded hag ann Ébestel, hag en deûz Doué testéniet gant burzudou, pé eo bét skrivet, pé n’eo két. Doué na hell két fazia nag hol lakaad da fazia ; râk-sé é krédomp kémend en deûz lavaret, évid-omp aliez na boellomp kéd anézhan. Dré ann Espérans, é c’hédomp gant fisians ar madou a ziougan Doué d’é-omp, péré eo ar c’hrâs er vuez-man hag ar vuez peûr-baduz é-c’houdé. Dré ar Garantez é karomp Doué dreist pép trâ hag hon nésa ével-d-omp hon-unan. Ar wella eo eûz ann teir vertuz-zé, hag hi hép-kén a choum da-vikenn.

Goulenn. Péd kévren a zô el lézen Gristen holl. Lavar. Péder. G. Livirit-hô. L. Sembol ann Ébestel, Péden ann Aotrou, Gourc’hémennou Doué hag ar Zakramanchou. G. Da béd vertuz eo pâr holl lézen Doué. L. Da deir. G. Livirit-hô. L. Ar Feiz, ann Espérans hag ar Garantez. G. Ha ni a hell kaoud ar vertusiou-zé ac’hanomb hon-unan. L. Nann ; réd eo é teûfé Doué d’hô rei d’é-omp. G. Pétrâ a ra ar Feiz. L. Hol lakaad a ra da gridi stard kémend en deûz Doué diskleried d’hé Iliz. G. Pénaoz éc’h ouzomp-ni en deûz Doué komzet ouc’h ann dûd. L. Dré ar vurzudou. G. Pérâg é krédomp-ni ar péz en deûz lavared d’é-omp. L. O véza na hell két fazia nag hol lakaad da fazia. G. Pétrâ a râ ann Espérans. L. Ma c’hédomp gant fisians ar madou a ziougan Doué d’é-omp. G. Péré eo ar madou-zé. L. Ar c’hrâs er vuez-man hag ar gloar enn ébén. G. Pétra eo ar Garantez. L. Ar garantez évid Doué Hag évid ann nésa. G. Péhini eo ar vrasa eûz ann teir vertuz-zé. L. Ar Garantez.