Ar verc’h hag ar vamm
Oberennoù damheñvel pe handelvoù all zo ivez, gwelout Ar Verc’h hag ar Vamm.
Selaouet hol, ha selaouet
Eur zôn ’zo newez gompozet ;
Eur zôn zavet a newez flamm,
A zo grêt d’eur verc’h ha d’he mamm.
Zavet ’zo disput etrez-he,
Da c’hoûd pini a zimêje.
— C’hui, ma mamm, ’zo erru en oad,
Hac a zo poent d’ac’h parfetad.
— Tawet, ma merc’h, na gomzet ket,
Pe me roïo d’ac’h war ho pec ;
Pe me roïo d’ac’h war ho pec,
Hac ho tisco da wall brezec !…
Fachet ar verc’h, êt en coler ;
Partia a ra euz ar gêr.
Mes evel ma oa eur pez-fall,
Ec’h es d’ober eun dro en Gall.
Homan oa zod, c’h es war he lerc’h :
— Dizro, ha deus d’ar gêr, ma merc’h !
Dizro, ma merc’h, ha deus d’ar gêr,
Te as po paotr, pa t-eus affer.
Me lezo ganid ar vicher,
Na pa ’z out capabl d’hi c’hober ;
P’out capabl d’hi c’hober, de, noz,
Rac me, ma merc’h, ’zo arri coz…
— Jezus ! ma mamm, clanvez on-me.
— Ma merc’hic, kerz en es cuele ;
Ma merc’hic, kerz en es cuele.
— Ma mamm, ne n’an ket foeltr fete !
— Ma merc’h, ’me ’r vamm, beza pô iod ?
— Ma mamm, ’me ’r plac’h, n'ê ket d’am got.
— Ma merc’h, ha beza ho pô cod ?
— Ma mamm, gwell ve ganin eur pôtr.
— Ma merc’h, ha c’hui, mezhi, pô scorn ?
Abredic crog ar bic ’n ho scouarn.
— Ma mammn, ’mezhi, hac a ven dall,
Me ’m eus c’hoant-pôtr, couls hac eun all.
— Me gred, ma merc’h, brazès ez oc’h ?
— Ma mamm, c’hui a zo bet kentoc’h.
— Me gred, ma merc’h, ez oc’h brazès ?
— Ma mamm, c’hui ’zo bet aliès.
— Ma merc’h, me lavaro d’am mab.
— Ma mamm, me ho tifi er-fad,
Rac d’ho mab mar hen leveret,
C’hui a zo zur da voud lac’het.
— Ma merc’h, ma merc’h, lès en ho fri !
— Ma mamm, ma mamm, coc’h ’n ho hini !
— Ma merc’h, ma merc’h, poènt ho timi !
— Ma mamm, ma mamm, clasket goaz d’in !
— Ma merc’h, ma merc’h, euz giès oc’h !
— Ma mamm, ma mamm, hugnodès oc’h !
François Corffc. — Duault.