Eur Zoudard yaouank
marvet er Marok
————
Ton : Breudeur ni glem ho klemmo.
Pell pell diouz bro ha kerent,
Newe-deut er Marok,
Eur zoudard a renk kerkent
Senti ha mont arôk,
Mont da c’hedal, noz ha de,
Enebourien kilhen,
Enebourien didrue
A gaz ar Fransijen.
|
Kerzet a ra kalonek, pa glewer er pelder
Tenno fuzuilh o strakal e keit ha ma weler
Kezeg ar Varokaned, a ra d’ar poultr franwal,
O tont d’ar pewar-lamp-ru, warne tud o skrijal.
Eur pez kanol, hep dihan, drailh ar Varokaned
A renk trei kein ’despet d’ê, e-kreiz poultr ha moged ;
Mes eur zoudard a zo kouêt, eur zoudard yaouank c’hoaz,
An hini am eus hanvet, newe-aru, siouaz !
|
Koll a ra aleiz e wad,
Hep koll anaoudegez....
« Eur beleg wit kovesât ! »
A lar ar zoudard kez.
« Eur beleg, en han’ Doue,
« Arôk mervel aman !
« Eur beleg ’wit ma ine
« Ha dour, dour da evan ! »
N’eus beleg ebet war dro,
N’eo ken kont ’vel gwechall !
Ar zoudard ’pal ar maro
’Renko mont d’ar bed-all
Hep gallout kât absolven,
Hep gallout lavaret :
« Ma zad ! d’am mam ’zo kristen,
« Em hano, c’houi, skrivet ! »
|
Dambrest ar zoudard yaouank a zo dinerzet oll ;
Kaer ’zo stanka ar gouli, e wad a dalc’h da goll,
« Eur beleg, en han’ Doue !… ma mam !… dour, mar plij… dour ! »
Dour a zo da rei d’ean ; neus ket a govezour !
Pa weler o tont, du-hont, war eun aneval gwen,
Eun den a anaveer,… evurusat tremen !
Eur beleg dimeus ar Spagn, eur beleg katolik ;
Eman etal ar c’hlanvour a varvo bremaïk !
Rei ’ra d’ean absolven ha peden an nouen ;
Ar zoudard yaouank neuze a losk eur glemmaden,
Strafuilhet e zaoulagad, e lar arôk mervel :
« Mam ! Kenavo, kenavo ! Skrivet d’ei, tad santel ! »
|
————
