Sketla Segobrani vol3/Rann 09
Edo eur ramzez en he c’hoazez e-kreiz ar c’heo-ze war eur sez rec’hier. Garv ha skarnilek an dremm anezi, ruz evel daou aval he divoc’h, du he bleo evel plunv bran, henvel he daoulagad ouz an noz stergannek. En he c’herc’henn eun dro-c’houzoug dent-arzed hag en he divrec’h troiou-brec’h kregin-mor. En-dro d’he c’horf eur vantell vras graet a veur a groc’hen arz du kenwriet [1]. En he c’hichen, war gab e reor, eur c’hi trifennek [2], kuilh, kigennek, divent, damwenn e liou, erezus evel eun teuz. Eun daoulagad ruz o skedi e peb-unan eus e dri fenn. En-dro d’e c’houzoug teo-euzus eur gelc’henn houarn. Dalc’het ez oa a-ere eur rao houarn graet ganti seiz tro ouz sez ar ramzez. Eus ar geoliou anezan e tevere strilhadennou gwad, e tivilhie drailhennou kig ha garennou tud [3]. Kerkent ha ma welas-hen ar plac’h yaouank, ar roue hag an daou jao, e savas war e beder-gar hag, o tigeri e dri geol, e stagas da harzal gant ker bras kounnar ken e tislonkas kement drailhenn gik tud a oa en e gof. Atepomaros a welas neuze an holl zrailhennou-ze o finval war an douar e-harz treid ar c’hi : ar pennou muturniet o ruilha a-zehou hag a-gleiz, en eur lenva, o kloza-digloza o daoulagadou, hag ar garou-tud o plega-diblega, hag ar darnennou kig, an tammou eskern hag al lommadou gwad oc’h en em stleja an eil re daved ar re-all, a-dreuz d’ar mein ha d’ar poultr, p’edo an holl relegou-ze o klask en em anaout d’en em strolla ha da genstumma adarre korfou beo.
- ↑ War an doare eus ar mentell-krec’hen-ze sellout ar C’helt eus bolz-enor Orange, Schumacher, Verzeichnis der Abgüsse und wichtigeren Photographien mit Gallier-Darstellungen (Mainz, 1911), p. 55, sk. 41, hag ar C’helt war gizelladur-bos envor-trec’h ar Vatikan, Schumacher, Verzeichnis der Abgüsse und wichtigeren Photographen mit Germanen-Darstellungen (Mainz, 1912), p 82, luc’hskeudenn 10. Ar c’hinkladuriou a zent-arzed ha kregin-mor a oa anezo en hen-oadvez hag en nevez-oadvez ar maen, S. Reinach Histoire du Travail en Gaule à l’Exposition universelle de 1889, Paris 1890, p. 28-9.
- ↑ S. Reinach, Bronzes figurés, p. 132-3. Kenveria Anderson-Leclercq, pp. 242, 276 ; Loth, Mabinogion, I, p. 31, notenn 1 (kenta mouladur).
- ↑ Kenveria an euzviled, garennou-tud a-zistribilh ouz o geol, skeudennet da varevez Hallstatt war kelern an Europ-kreiz hag an Itali-Uhela, A. Bertrand ha S. Reinach, Celtes dans les vallées du Pô et du Danube, pp. 109, 114, skeudennou 63, 72 ; lenn war ze eveziadennou S. Reinach Exquisses archéologiques, Paris, 1888, p. 59, danevell ha notennou 1 ha 2. Gwelout ouzpenn S. Reinach, les Carnassiers androphages dans l'Art gallo-romain, in Rev. celt. 1904, pp. 208-24.